Pune : शुभ्यानेच केला घात! १८ लाखांचा व्यवहार, ११ लाखांची वसुली पण… पुण्यातील खुनाचा गुन्हा पोलिसांनी १२ तासांत उघड केला

Pune : पैशांच्या देवाणघेवाणीच्या वादातून मित्रानेच साथीदारांच्या मदतीने आपल्या मित्राचा निघृण खून केल्याची धक्कादायक घटना वारजे परिसरात उघडकीस आली आहे. या प्रकरणातील आरोपींना पुणे शहर पोलिसांच्या गुन्हे शाखेने अवघ्या १२ तासांच्या आत जेरबंद केले आहे. राजेंद्र सुभाष ऐलगच्चे (रा. आंबेगाव, पुणे) असे खून झालेल्या तरुणाचे नाव आहे.

वारजे माळवाडी पोलिस ठाण्यात दाखल गुन्ह्याचा समांतर तपास सुरू असताना पोलिस अंमलदार बाळू गायकवाड व साई कारके यांना खबऱ्यामार्फत गणपती माथा ते शिंदे पूल दरम्यान दोन संशयित इसम थांबल्याची माहिती मिळाली. त्यानुसार पोलिस निरीक्षक दत्ताराम बागवे यांच्या नेतृत्वाखाली पथकाने सापळा रचला. पोलिसांची चाहूल लागताच संशयित पळून जात असताना पाठलाग करून ताब्यात घेण्यात आले. शुभम राजेश शिंदे (वय २५, रा. नांदेड सिटी), लकी सुरेंद्र सिंग (वय २३, रा. खडकी) आणि सुनील संतोष खलसे ऊर्फ एस. के. (वय १९, रा. कर्वेनगर) अशी अटक केलेल्यांची नावे आहेत. एका अल्पवयीनाला ताब्यात घेण्यात आले. आरोपींकडे विचारपूस केली असता, त्यांनी गुन्ह्याची कबुली दिल्याचे पोलिसांनी सांगितले.

Pune Mayor : पुण्याच्या महापौरपदी कोणाची वर्णी? फडणवीसांकडून हिरवा कंदील बाकी, निवडीचा मुहूर्त ठरला; राजकीय हालचालींना वेग.

राजेंद्र ऐलगच्चे याला २१ जानेवारी २०२६ रोजी रात्री आकाशनगर येथील शनी मंदिर टेकडी येथे पैशांच्या व्यवहाराच्या कारणावरून बोलावून घेतले. त्यानंतर लोखंडी हत्याराने वार करून डोक्यात दगड घालून खून केला. ओळख लपविण्यासाठी चेहऱ्यावरही दगडाने घाव घातल्याचे तपासात स्पष्ट झाले आहे. प्राथमिक माहितीनुसार मयत राजेंद्र याने एकाला १८ लाख रूपये दिले होते, है पैसे वसुल करून देतो आरोपी शुबमने सांगितलं. यामधील जवळपास ११ लाख रूपये त्याने वसलूही केले होते, है पैसे राजेंद्र मागू लागला होता. मात्र शुभमने त्याच्या साथीदारांसह बोलावून घेत त्याला संपवण्याचा कट आखला, जेणेकरून राजेंद्रला मारल्यावर पैसे द्यावे लागणार नाहीत.

दरम्यान, आकाशनगर येथील वन विभागाच्या जागेत अज्ञात तरुणाचा मृतदेह आढळल्याने परिसरात खळबळ उडाली होती. वारजे पोलिस ठाण्यात शिपाई भूषण निकम यांनी तक्रार दाखल केली होती. प्राथमिक तपासात धारदार हत्याराने हल्ला करून खून झाल्याचे स्पष्ट झाले. पुढील तपासात मृत तरुणाची ओळख निष्पन्न झाली. पोलिस निरीक्षक दत्ताराम बागवे आणि त्यांच्या पथकाने गुन्ह्याचा छडा लावला. आरोपींना पुढील तपासासाठी वारजे माळवाडी पोलिस ठाण्याच्या ताब्यात देण्यात आले असून, खुनामागील आर्थिक व्यवहाराचा सखोल तपास सुरू आहे.