Pune Mayor : पुण्याच्या महापौरपदी कोणाची वर्णी? फडणवीसांकडून हिरवा कंदील बाकी, निवडीचा मुहूर्त ठरला; राजकीय हालचालींना वेग.

Pune : महापौर आणि उपमहापौरांच्या निवडणुकीसाठी सहा फेब्रुवारीचा ‘मुहूर्त’ काढण्यात आला आहे. महापालिका प्रशासनाने पाठवलेल्या पत्रानुसार विभागीय आयुक्त चंद्रकांत पुलकुंडवार यांनी महापालिकेला महापौर निवडीसाठी पंधरा दिवसांचा कालावधी दिला आहे.

राज्याच्या नगरविकास विभागाने ३० ते ३१ जानेवारी दरम्यान ही निवड करण्याच्या सूचना दिल्या असल्या तरी प्रत्यक्षात मात्र, हे शक्य नसल्याने महापालिकेने ही कार्यवाही करण्यासाठी १५ दिवसांचा कालावधी विभागीय आयुक्तांकडे मागितला होता. त्यानुसार सहा फेब्रुवारीला विशेष सर्वसाधारण सभा घेण्याचे नियोजन केल्याचे महापालिका प्रशासनाने जाहीर केले आहे.

Pune : मुळा-मुठा नदीकाठावर ५० घाट, ४४ किमी जॉगिंग ट्रॅक, २१७ प्रवेशमार्ग… प्रजासत्ताकदिनी पुणेकरांना नवा श्वास! बहुप्रतिक्षित रिव्हरफ्रंट मार्ग खुला; कसा बदलणार शहराचा चेहरा?

राज्याच्या नगरविकास विभागाने महापौर निवडीचा कार्यक्रम जाहीर केला आहे. पुणे महापालिकेतील गटनेत्यांची अद्याप नियुक्तीच झाली नसून, गट नोंदणीही झालेली नाही. राज्याच्या नगरविकास विभागाने याबाबत ‘डेडलाइन’ दिली असली तरी पाळणे अनेक महापालिकांना शक्य नव्हते, तर महापालिका प्रशासनाकडून फेब्रुवारीच्या पहिल्या आठवड्यात महापौर निवडीची सर्वसाधारण सभा घेण्याची तयारी ठेवण्यात आली होती. त्यानुसार विभागीय आयुक्तांकडून पुणे आणि पिंपरी-चिंचवड या दोन्ही महापालिकांमध्ये सहा फेब्रुवारी रोजी महापौर, उपमहापौरांची निवड केली जाणार असल्याचे सांगण्यात आले आहे. पुणे महापालिकेची विशेष सर्वसाधारण सभेच्या तारखेत बदल होण्याची शक्यता आहे. ही तारीख नऊ किंवा ११ फेब्रुवारीपर्यंत लांबू शकते, असा दावा उच्चपदस्थ सूत्रांकडून करण्यात आला आहे.

महापौर, उपमहापौर निवडीसाठी आयोजित करण्यात येणाऱ्या विशेष सर्वसाधारण सभेत स्थायी समिती; तसेच विशेष समितींच्या सदस्यांच्या नियुक्तीचा विषय अजेंड्यावर येणार असला तरी त्या होणार नाहीत. महापौर, उपमहापौर निवडीनंतर ही सभा तहकूब करण्यात येते. महापौर आणि उपमहापौर यांच्या निवडीनंतर त्यांच्या अभिनंदनाचा ठराव मांडण्यात येतो. त्या ठरावावर सदस्यांकडून भाषणे करण्यात येतात, तर सभा तहकूब करून तिची तारीख नंतर ठरविण्यात येतो. त्यामु‌‌ळे सहा फेब्रुवारीच्या सभेत स्थायी अथवा इतर विषय समित्यांवरील सदस्यांची नियुक्ती केली जाणार नसल्याचे सूत्रांनी सांगितले.

सभागृह नेत्याची नोंदणी पुढील आठवड्यात
भारतीय जनता पक्षाच्या कोअर कमिटीची बैठक शनिवार-रविवारी होणार असून, त्यामध्ये महापौर, उपमहापौर; तसेच सभागृह नेत्याच्या नावाचा विचार केला जाणार आहे. ही नावे मुख्यमंत्री देवेंद्र फडणवीस आणि प्रदेशाध्यक्ष रवींद्र चव्हाण यांना सादर केली जाणार आहेत. त्यांच्याकडून या नावांना हिरवा कंदील आल्यानंतर पुढील कार्यवाही होणार आहे. भाजपकडून पुढील आठवड्यात गट नोंदणी केली जाणार आहे. त्यापूर्वी गटनेता निवडला जाणार असून, पुढील आठवड्यात ही सर्व प्रक्रिया पूर्ण केली जाईल, असे उच्चपदस्थ नेत्याकडून सांगण्यात आले आहे.