Pune : EVM बदलल्याचा आरोप; रुपाली पाटील आक्रमक, मतमोजणी केंद्राबाहेर गदारोळ

Pune : पुणे महापालिकेतील निवडणुकांमध्ये रंगतदार लढाया पाहायला मिळत आहेत. उपमुख्यमंत्री अजित पवार यांच्या नेतृत्वातील राष्ट्रवादी काँग्रेसच्या उमेदवार रुपाली पाटील ठोंबरे चांगल्याच आक्रमक झाल्याचे पाहायला मिळत आहे. मशीन बदलल्याचा आरोप करत रुपाली पाटील यांनी पुण्यातील न्यू इंग्लिश स्कूल केंद्रावरील मतमोजणी थांबवली.

राष्ट्रवादी काँग्रेसच्या नेत्या रुपाली पाटील ठोंबरे आक्रमक झाल्या आहेत. मशीन बदलल्याचा आरोप करत रुपाली पाटील यांनी आक्षेप घेतला. त्यानंतर मतमोजणी थांबवण्यात आली. जवळपास १ तासांहून जास्त काळ मतमोजणी बंद होती.

BMC Election Result : मुंबईत इतिहास घडणार! पहिल्यांदाच भाजपचा महापौर; महायुती बहुमताच्या दिशेने, कोणते पक्ष आघाडीवर?

पुण्यातील प्रभाग क्रमांक २६ सह दोन जागांवर रुपाली पाटील ठोंबरे निवडणुकीच्या रिंगणात उतरल्या आहेत. पुणे महापालिकेत दोन्ही राष्ट्रवादींची युती झाल्यानंतर उमेदवारी अर्ज भरण्याच्या शेवटच्या दिवशी त्यांना एबी फॉर्म मिळाला होता.

रुपाली पाटील पुणे महापालिकेतील माजी नगरसेविका आहेत. राज ठाकरे यांच्या नेतृत्वातील महाराष्ट्र नवनिर्माण सेनेकडून त्यांनी नगरसेवकपद भूषवले आहे. मनसेला रामराम ठोकून २०२१ मध्ये रुपाली पाटील यांनी राष्ट्रवादी काँग्रेसमध्ये प्रवेश केला. राष्ट्रवादीत फूट पडल्यानंतर त्यांनी अजित पवार यांची साथ दिली होती.

रुपाली चाकणकर आणि रुपाली पाटील यांच्यामधील अंतर्गत वाद काही दिवसांपासून उफाळून आलेला दिसला. पक्षातील अंतर्गत वादामुळे अस्वस्थ असलेल्या रुपाली पाटील राष्ट्रवादीला रामराम ठोकणं निश्चित मानलं जात असतानाच रुपाली पाटील यांनी शिवसेना खासदार श्रीकांत शिंदे यांची भेट घेतल्याने त्या 'घड्याळ' सोडून शिवसेनेत प्रवेश करण्याच्या चर्चा रंगल्या होत्या.

याआधी, स्थानिक स्वराज्य संस्था आणि महापालिका निवडणुकांच्या पार्श्वभूमीवर अजित पवार यांनी नगरपरिषद आणि नगरपंचायत निवडणुकांसाठी राष्ट्रवादीच्या स्टार प्रचारकांची यादी जाहीर केली होती. त्यात रुपाली पाटलांना स्थान मिळालं नव्हतं. त्यापूर्वी प्रवक्त्यांच्या यादीत त्यांना जागा मिळाली नव्हती. त्यामुळे रुपाली पाटलांची पक्षातून गच्छंती निश्चित मानली जात असताना त्यांना तिकीट मिळाले.