Pune : 'जमीनचोरीतील दोन मोठी प्रकरणं घेऊन लवकरच भेटू'; धंगेकरांचा मोहोळांवर आणखी एक स्फोटक आरोप

Pune : शिवसेनेचे महानगरप्रमुख रवींद्र धंगेकर आणि केंद्रीय राज्यमंत्री मुरलीधर मोहोळ यांच्यातील संघर्ष आता अधिकच चिघळला आहे. धंगेकर हे सलग आरोपांच्या मालिकेतून मोहोळ यांच्यावर राजकीय दबाव वाढवत आहेत. जैन बोर्डिंग जमीन प्रकरणात गंभीर आरोप केल्यानंतर त्यांनी आता पुन्हा एकदा “जमीन चोरांचा थेट सहभाग असलेली दोन प्रकरणे घेऊन लवकरच भेटुयात,” असे म्हणत नवा स्फोटक दावा केला आहे.

दरम्यान, मुरलीधर मोहोळ यांनी काल माध्यमांशी बोलताना “मला त्या माणसाबद्दल परत बोलायचं नाही. 2011 मध्ये त्याच्यावर फौजदारी गुन्हा दाखल झाला होता. कोथरूडमध्ये जमीन बळकावली होती आणि जामीन न घेता पळाला होता. या माणसावर दहा गुन्हे आहेत, माझ्यावर एकही नाही,” असे म्हणत धंगेकरांवर पलटवार केला होता.

Beed : साताऱ्यात आत्महत्या केलेल्या महिला डॉक्टरवर बीडमध्ये अंत्यसंस्कार; मूळ गावी ग्रामस्थांची गर्दी, कुटुंबीयांचा आक्रोश

यावर प्रतिक्रिया देताना रवींद्र धंगेकर यांनी मोहोळ यांच्या निवडणूक प्रतिज्ञापत्रातील प्रत सादर करत, “मोहोळ यांनी सांगितले की त्यांच्यावर एकही गुन्हा नाही, पण त्यांच्या एफिडेविटमध्ये अनेक गुन्हे नमूद आहेत. अगदी ॲट्रॉसिटीसारखाही गुन्हा त्यांच्यावर दाखल आहे,” असा दावा केला.

धंगेकर पुढे म्हणाले, “राजकीय कार्यकर्त्यांवर आंदोलनाशी संबंधित काही प्रकरणे असू शकतात, पण जेव्हा एखादा केंद्रीय राज्यमंत्री स्वतःवर एकही गुन्हा नाही असे सांगतो, तेव्हा तो माध्यमांसह पुणेकरांचीही फसवणूक करतो. हे अशोभनीय आहे.”

धंगेकरांच्या नव्या आरोपांमुळे रवींद्र धंगेकर आणि मुरलीधर मोहोळ यांच्यातील राजकीय संघर्ष आणखी तीव्र होण्याची शक्यता आहे.