Pune : जैन बोर्डिंग जमीन वाद : केंद्रीय मंत्री मोहोळ अडचणीत? प्रकरण आता पंतप्रधानांच्या कोर्टात!

Pune :  पुण्यातील जैन ट्रस्टच्या मालमत्ता व्यवहारातील अनियमितता आणि केंद्रीय राज्यमंत्री मुरलीधर मोहोळ यांच्या सहभागाबाबत चौकशी करण्यासाठी विजय कुंभार यांनी पंतप्रधान नरेंद्र मोदी यांच्याकडे अर्ज केला आहे. यामुळे केंद्रीय मंत्री मोहोळ यांच्या अडचणी वाढण्याची चर्चा सुरु झाली आहे.

विजय कुंभार यांच्या आरोपानुसार, हिराचंद नेमचंद दोशी मेमोरियल ट्रस्टच्या सुमारे ३ एकर जमिनीचा व्यवहार गोखले लँडमार्क्स एलएलपी या कंपनीने कायदेशीर आणि प्रक्रियात्मक नियमांचे उल्लंघन करून केला. या व्यवहारासाठी बुलढाणा अर्बन को-ऑप क्रेडिट सोसायटी (महाराष्ट्र) आणि बिरेश्वर को-ऑप क्रेडिट सोसायटी (कर्नाटक) यांनी नियमांचे उल्लंघन करून मोठ्या रकमेचे कर्ज मंजूर केले, ज्यामुळे बाह्य दबाव किंवा प्रभावाचा संशय निर्माण झाला.

Pune : 'जमीनचोरीतील दोन मोठी प्रकरणं घेऊन लवकरच भेटू'; धंगेकरांचा मोहोळांवर आणखी एक स्फोटक आरोप

विजय कुंभार यांनी म्हटले की, केंद्रीय सहकार राज्यमंत्री मुरलीधर मोहोळ यांच्याकडे या मल्टी-स्टेट को-ऑप सोसायटींच्या प्रशासकीय देखरेखीची जबाबदारी आहे. तसेच त्यांनी गोखले लँडमार्क्स एलएलपीच्या ‘गोखले बिझनेस बे’ प्रकल्पाला प्रोत्साहन दिले असून, कंपनीच्या भागीदारांशी त्यांचे जवळचे संबंध आहेत. त्यामुळे दोन्ही बाजूने मोहोळ यांचा या प्रकरणाशी संबंध दिसतो.

त्यांच्या निवडणूक प्रतिज्ञापत्रानुसार, मोहोळ हे गोखले इस्टेट्स एलएलपीमध्ये ५०% भागीदार होते, जी गोखले लँडमार्क्सशी संबंधित आहे. महाराष्ट्र रिअल इस्टेट नियामक प्राधिकरणाने (महारेरा) गोखले लँडमार्क्सवर रेरा कायद्याचे उल्लंघन केल्याबद्दल कारवाई केली आहे. ‘गोखले बिझनेस बे’ आणि ‘तेजकुंज’ प्रकल्पांसाठी एकच बँक खाते वापरल्याने, तसेच ७०% निधी स्वतंत्र ठेवण्याच्या नियमाचे पालन न केल्यामुळे प्रकल्पाची नोंदणी रद्द, बँक खाती गोठवली आणि विक्रीवर बंदी घालण्यात आली.

अद्यापर्यंतही सहकारी संस्थांनी सुमारे ७० कोटींचे कर्ज मंजूर केले आणि नंतर तारण हक्क सोडले, ज्यामुळे गैरव्यवहाराचा संशय वाढतो. मोहोळ यांनी याप्रकरणी कोणतीही कारवाई न करता स्वतःला दूर ठेवले आहे, ज्यामुळे हितसंबंधांचा संभाव्य गैरवापर आणि सहकारी प्रशासनावरील विश्वास कमी होतो, असे कुंभार यांनी म्हटले.

पंतप्रधानांकडे केलेल्या मागण्या:

1. जैन ट्रस्टच्या जमीन व्यवहाराची सखोल चौकशी करावी.

2. गोखले लँडमार्क्स एलएलपी, दोन्ही सहकारी संस्था आणि संबंधित अधिकाऱ्यांच्या भूमिकेची तपासणी करावी.

3. मुरलीधर मोहोळ यांच्या सहभागाची चौकशी करून हितसंबंधांचा गैरवापर असल्यास त्यांच्यावर कारवाई करावी.