Nanded :बहिणीची सोयरीक मोडल्याचा बदला? सोनू कल्याणकर खून प्रकरणात धक्कादायक ट्विस्ट

 

Nanded :नांदेडमध्ये अनिकेत ऊर्फ सोनू कल्याणकर यांच्या निर्घृण खुनामुळे शहरात खळबळ उडाली असून या प्रकरणात आता मोठा ट्विस्ट समोर आला आहे. सुरुवातीला हा खून जुन्या वादातून झाल्याचे सांगितले जात होते, मात्र आता प्रेमसंबंध आणि सूड या कारणांमुळे हत्या घडवून आणल्याचा गंभीर आरोप समोर आला आहे.

 

काय आहे संपूर्ण प्रकरण?

सोमवारी सकाळी चार जणांनी धारदार शस्त्रांनी सपासप वार करत सोनू कल्याणकर यांची हत्या केली. या घटनेनंतर पोलिसांनी तातडीने कारवाई करत काही तासांतच आरोपींना अटक केली. अटकेदरम्यान एका आरोपीने पोलिसांवर गोळीबार केला, त्याला प्रत्युत्तर देताना पोलिसांनी केलेल्या कारवाईत अंकुश गंदमवार जखमी झाला.

प्रेमप्रकरणातून खून?

सोनूच्या वडिलांनी केलेल्या तक्रारीनुसार, हा खून प्रेमप्रकरणातून आणि सूडबुद्धीने करण्यात आला आहे. सोनूचे एका मुलीसोबत संबंध होते. मात्र 2020 साली त्याने त्या मुलीची सोयरीक मोडल्याचा आरोप आहे. याच कारणावरून मुलीच्या भावाने बदला घेतल्याचा दावा करण्यात आला आहे.

तुरुंगातून रचला कट?

या प्रकरणातील मुख्य सूत्रधार म्हणून कुख्यात गुन्हेगार गोलू मंगनाळे याचे नाव समोर आले आहे. तो सध्या तुरुंगात असूनही त्यानेच हा कट रचल्याचा आरोप आहे. त्याच्या वडिलांसह इतर साथीदारांच्या मदतीने ही हत्या घडवून आणल्याचे तक्रारीत नमूद करण्यात आले आहे.

पूर्वीही झाला होता हल्ला

ऑगस्ट 2021 मध्येही गोलू मंगनाळे आणि त्याच्या साथीदारांनी सोनूवर गोळीबार केला होता. मात्र त्या हल्ल्यातून तो बचावला होता. त्यानंतरही त्याला सतत जीवे मारण्याच्या धमक्या दिल्या जात असल्याचे समोर आले आहे.

सहा जणांवर गुन्हा दाखल

या प्रकरणी भाग्यनगर पोलीस ठाण्यात सहा जणांविरोधात गुन्हा दाखल करण्यात आला असून पोलिसांकडून अधिक तपास सुरू आहे. या घटनेमुळे नांदेड शहरात भीतीचे वातावरण पसरले आहे.