Nagpur : नागपुरात संवेदनशील भागात विस्फोटकांचा साठा; १५ जिलेटीन कांड्या आणि ५८ डिटोनेटर जप्त

Nagpur : नागपूर शहरातील सीए रोड परिसरात मोठ्या प्रमाणात जिवंत विस्फोटक सापडल्याने खळबळ उडाली आहे. गणेशपेठ पोलीस ठाण्याच्या हद्दीतील दोसर भवन चौकात, मेट्रो स्टेशनच्या शेजारील अत्यंत संवेदनशील भागात ही घटना उघडकीस आली.

आज सकाळी एका घराजवळ संशयास्पद बॅग आढळल्याची माहिती पोलिसांना मिळाल्यानंतर तपास करण्यात आला. संबंधित बॅगमध्ये १५ जिलेटीन कांड्या, ५८ डिटोनेटर आणि ८ कनेक्टर आढळून आले. ही बॅग गेल्या एक ते दीड महिन्यांपासून त्या ठिकाणी पडून असल्याची प्राथमिक माहिती समोर आली आहे. आज सकाळी बॅगमधील जिलेटीन कांड्या बाहेर दिसू लागल्याने घरमालकाने तत्काळ पोलिसांना कळवले.

माहिती मिळताच पोलिसांसह बॉम्ब शोधक व नाशक पथक (BDDS) घटनास्थळी दाखल झाले. त्यांनी परिसर सील करून शोधमोहीम राबवली. सर्व विस्फोटक साहित्य सुरक्षितपणे जप्त करून पुढील तपासासाठी हलविण्यात आले असून, सुदैवाने कोणतीही जीवितहानी झाली नाही.

विशेष म्हणजे, घटनास्थळ अत्यंत संवेदनशील परिसरात आहे. येथून सुमारे २०० मीटर अंतरावर जामा मशिद, ५०० मीटरवर पोद्दारेश्वर राम मंदिर आणि दीड ते दोन किलोमीटर अंतरावर राष्ट्रीय स्वयंसेवक संघाचे मुख्यालय आहे. त्यामुळे या घटनेचे गांभीर्य अधिक वाढले आहे.

प्राथमिक तपासात नागपूर जिल्ह्यातील काटोल परिसरातील एसबीएल कंपनीत झालेल्या स्फोटाशी या साहित्याचा संबंध असण्याची शक्यता वर्तवण्यात येत आहे. संबंधित स्फोटक साहित्य येथे बेवारस अवस्थेत आणून टाकण्यात आले असावे, असा पोलिसांचा अंदाज आहे. मात्र, याबाबत अद्याप अधिकृत दुजोरा देण्यात आलेला नाही.

पोलिस उपायुक्त राहुल मदने यांनी सांगितले की, आढळलेले सर्व साहित्य सुरक्षित करण्यात आले असून प्रकरणाचा सखोल तपास सुरू आहे. हे विस्फोटक येथे कोणी आणि कोणत्या उद्देशाने ठेवले, याचा शोध घेतला जात आहे. सीसीटीव्ही फुटेज आणि तांत्रिक पुराव्यांच्या आधारे संशयितांचा शोध सुरू आहे.

या घटनेमुळे शहरात भीतीचे वातावरण निर्माण झाले असून नागरिकांना अफवांवर विश्वास न ठेवण्याचे आवाहन पोलिसांनी केले आहे. कोणतीही संशयास्पद वस्तू आढळल्यास तात्काळ पोलिसांना कळवावे, असेही आवाहन करण्यात आले आहे.