Pune : सुधारणा न झाल्यास गुंडांवर कडक कारवाईचा इशारा; रामटेकडी पोलीस चौकीचे पोलीस आयुक्तांच्या हस्ते भूमिपूजन

Pune : हडपसरमधील रामटेकडी परिसरात नवीन पोलीस चौकी उभारण्याच्या कामाला सुरुवात झाली असून, या निमित्ताने पोलीस आयुक्त अमितेश कुमार यांनी गुन्हेगारांना स्पष्ट इशारा दिला. “गुन्हेगारांना सुधारण्याची संधी दिली जाते; मात्र सुधारणा न झाल्यास गुंडांविरुद्ध कडक कारवाई करून त्यांची धिंड काढली जाईल,” असे त्यांनी सांगितले.

रामटेकडी परिसरात दाट वस्ती असून सुमारे ३० हजार नागरिक येथे वास्तव्यास आहेत. या भागातील गुन्हेगारी रोखण्यासाठी नवीन पोलीस चौकी उभारण्याचा निर्णय घेण्यात आला आहे. या चौकीच्या बांधकामासाठी बांधकाम व्यावसायिक नाईकनवरे यांचे सहकार्य लाभले असून, भूमिपूजन पोलीस आयुक्त अमितेश कुमार यांच्या हस्ते पार पडले.

या कार्यक्रमाला आमदार चेतन तुपे, सहपोलीस आयुक्त रंजनकुमार शर्मा, गुन्हे शाखेचे पोलीस उपायुक्त पंकज देशमुख, परिमंडळ पाचच्या पोलीस उपायुक्त राजलक्ष्मी शिवणकर, झोपडपट्टी पुनर्विकास प्राधिकरणाचे मुख्य कार्यकारी अधिकारी सतीशकुमार खडके, नगरसेविका हेमलता मगर तसेच हेमंत, रणजीत आणि गौरी नाईकनवरे उपस्थित होते.

गृह विभागाने गेल्या वर्षी पुण्यात १२ नवीन पोलीस ठाण्यांना मंजुरी दिली असून त्यांचे कामकाज सुरू झाले आहे. याशिवाय, पुणे पोलीस दलात लवकरच १८०० पोलीस शिपायांची भरती होणार आहे. प्रशिक्षण पूर्ण झाल्यानंतर हे कर्मचारी सेवेत रुजू होणार असल्याने मनुष्यबळाची कमतरता भासणार नाही, असा विश्वास आयुक्तांनी व्यक्त केला.

रामटेकडी परिसरातील गुन्हेगारी पार्श्वभूमी असलेल्या व्यक्तींची तसेच अवैध धंदे करणाऱ्यांची माहिती संकलित केली जाणार आहे. सराईत गुन्हेगारांना सुधारण्याची संधी देण्यात येईल; मात्र त्यात बदल न झाल्यास कठोर कारवाई करण्यात येईल, असेही त्यांनी स्पष्ट केले.

पोलिसांकडून नगरसेवकांशी नियमित संवाद साधला जात असून, प्रभागातील गुन्हेगारी, अमली पदार्थ विक्री आणि अवैध धंद्यांविरोधात कारवाईसाठी त्यांच्या सहकार्याची गरज असल्याचेही त्यांनी नमूद केले. चेतन तुपे आणि हेमंत नाईकनवरे यांनी मनोगत व्यक्त केले, तर रणजीत नाईकनवरे यांनी आभार मानले.