Mumbai Crime : मुंबई हादरली! शेजारी राहणाऱ्या आजोबानेच केला घात, चाकू गळ्यावर ठेवत अल्पवयीन मुलीवर लैंगिक अत्याचार

Mumbai Crime : मुंबईमध्ये अल्पवयीन मुलीवर लैंगिक अत्याचार करण्यात आल्याची धक्कादायक घटना समोर आली आहे. शेजारी राहणाऱ्या व्यक्तीने चाकूचा धाक दाखवून या मुलीवर लैंगिक अत्याचार केले. मुलगी घरात एकटी असल्याचा फायदा घेत आरोपीने तिच्यावर अत्याचार केले. याप्रकरणी धारावी पोलिसांनी आरोपीविरोधात गुन्हा दाखल करत अवघ्या काही तासांत त्याला बेड्या ठोकल्या.

मिळालेल्या माहितीनुसार, धारावीमध्ये गणेश विसर्जनाच्या दिवशी म्हणजेच मंगळवारी एका अल्पवयीन मुलीवर लैंगिक अत्याचार झाले. ६० वर्षीय शेजाऱ्यानेच १५ वर्षीय मुलीवर लैंगिक अत्याचार केले. दुपारच्या सुमारास घरामध्ये मुलगी एकटीच होती. याचाच फायदा घेत आरोपीने तिच्या घरामध्ये प्रवेश केला आणि चाकूचा धाक दाखवून तिच्यावर लैंगिक अत्याचार केले.

Pune : पुण्यात नोकरी, ४ महिन्यांतच मृत्यू; २६ वर्षीय CA तरुणीचा 'वर्क प्रेशर'मुळं मृत्यू झाल्याचा आईचा आरोप

स्वतःची ओळख लपवण्यासाठी आरोपीने मास्क घालून मुलीवर लैंगिक अत्याचार केले.पण झटापटीत मास्क थोडा बाजूला झाल्याने तसेच अल्पवयीन मुलीने आवाज ओळखल्याने नराधमाचे बिंग फुटलं. आरडाओरड केल्यास गळा कापण्याची तसेच कोणाला काही सांगितल्यास ॲसिड फेकण्याची धमकी आरोपीने दिली होती. गळ्यावर चाकू ठेवल्यामुळे अल्पवयीन मुलीच्या गळ्याला जखमा झाल्या आहेत.

या घटनेप्रकरणी पीडित मुलीने कुटुंबीयांना माहिती दिली. त्यांनी तात्काळ धारावी पोलिस ठाण्यामध्ये धाव घेत तक्रार दाखल केली. पोलिसांनी आरोपीविरोधात बलात्कार तसेच बालकांचे लैंगिक अत्याचारापासून संरक्षण कायद्याच्या कलम ४, ८, १२ अंतर्गत गुन्हा दाखल करत अटक केली. आज आरोपीला कोर्टामध्ये हजर केले जाणार आहे. या घटनेमुळे मुंबईमध्ये खळबळ उडाली आहे.