Pune : शुक्रवार पेठेत बोगद्याला भगदाड, पाण्याची गळती; महापालिकेची कठोर कारवाई, सुरक्षेसाठी नवी नियमावली लवकरच

Pune : भूमिगत मेट्रो मार्गांच्या सुरक्षेला थेट धोका निर्माण करणाऱ्या बोअरवेलच्या घटनेनंतर महापालिकेने कठोर भूमिका घेतली असून, मेट्रो बोगद्यांवर आणि परिसरातील सर्व बांधकामांवर नियंत्रण ठेवण्यासाठी स्वतंत्र व सविस्तर नियमावली लागू करण्याचा निर्णय घेतला आहे. या नव्या नियमांद्वारे प्रत्येक बांधकामावर बारकाईने नजर ठेवली जाणार असल्याची माहिती महापालिका आयुक्त नवलकिशोर राम यांनी दिली.

संबंधितांविरुद्ध गुन्हा दाखल
शुक्रवार पेठेत खडक पोलिस ठाण्यासमोर बोअरवेल खोदताना मेट्रोच्या बोगद्याला भगदाड पडले. स्वारगेट-शिवाजीनगर मार्गावरील बोगद्यात पाण्याची गळती सुरू झाल्यानंतर मेट्रो प्रशासनाने तातडीने हस्तक्षेप करून संबंधित घरमालक व ठेकेदाराविरोधात गुन्हा दाखल केला.

या घटनेनंतर महापालिका आणि मेट्रो प्रशासन अधिक सजग झाले असून, भविष्यात अशा घटना टाळण्यासाठी व्यापक उपाययोजना आखण्यात येत आहेत. पेठ भागांतील प्रलंबित पुनर्विकास प्रकल्प आणि सुरू असलेली बांधकामे लक्षात घेऊन मेट्रो बोगद्यांवर अतिरिक्त ताण येण्याची शक्यता आहे. या पार्श्वभूमीवर या बांधकामांवर नियंत्रणासाठी नियमावली तयार करण्यात येत आहे. नव्या नियमावलीनुसार, मेट्रो बोगद्यांच्या वर किंवा परिसरातील प्रत्येक बांधकामासाठी स्वतंत्र तांत्रिक परवानगी अनिवार्य असेल. बोअरवेल खोदकामासाठी भूजल विभागाची स्वतंत्र मंजुरी बंधनकारक असेल. सुरक्षित अंतर, कंपन नियंत्रण, तांत्रिक निकष आणि मेट्रो संरचनेवरील परिणामांचा विचार या नियमावलीत केला जाईल.

शुक्रवार पेठेतील घटना अत्यंत गंभीर असून, भविष्यात मेट्रो प्रकल्पाला कोणताही धोका निर्माण होऊ नये यासाठी लवकरच कठोर नियमावली जाही केली जाईल अशी माहिती पुण्याचे महापालिका आयुक्त नवलकिशोर राम यांनी दिली आहे.

‘महामेट्रो’च्या नावाने बनावट वेबसाइट
महाराष्ट्र मेट्रो रेल कॉर्पोरेशनच्या (महामेट्रो) नावाने बनावट वेबसाइट आणि फेसबुकवर खोटे पेज तयार केल्याचा प्रकार समोर आला आहे. नोकरीच्या शोधात असलेल्या युवकांना लक्ष्य करून भरतीच्या नावाखाली दिशाभूल करणाऱ्या जाहिराती त्यावर प्रसारित केल्या जात असल्याचे उघड झाले आहे. याप्रकरणी महामेट्रोकडून सायबर पोलिसांकडे तक्रार दिली आहे. मेट्रोच्या अधिकाऱ्यांना त्यांच्या अधिकृत वेबसाइटसारखीच दुसरी वेबसाइट बनवल्याचे लक्षात आले. या फसव्या बनावट वेबसाइटसाठी ‘महामेट्रो’चा अधिकृत लोगो वापरून जाहिराती विश्वासार्ह भासवण्याचा प्रयत्न केला जात आहे. त्यामुळे अनेक उमेदवार या जाळ्यात अडकण्याची भीती आहे