Pune : पुण्यातील लाडक्या बहिणींना गिफ्ट; PMPच्या 31 बसमार्गांवर मोफत प्रवासाची सुविधा

Pune : पुणे महानगर परिवहन महामंडळाकडून (पीएमपी) जागतिक महिला दिनानिमित्त आठ मार्चला महिला विशेष बसमध्ये मोफत प्रवास करता येणार आहे. शहरातील एकूण ३१ मार्गांवर धावणाऱ्या बसमध्ये हा लाभ घेता येणार आहे.

पीएमपीकडून पुणे, पिंपरी-चिंचवड आणि ‘पीएमपीआरडीए’ हद्दीत सेवा दिली जाते. त्यामध्ये महिला प्रवाशांच्या सुरक्षिततेच्या दृष्टीने काही महिला विशेष बस सुरू केल्या आहेत. सध्या ३३ बसच्या माध्यमातून ७६ महिला विशेष फेऱ्यांद्वारे ही सेवा दिली जात आहे. शहराच्या वेगवेगळ्या भागांत महिला विशेष बसच्या माध्यमातून सेवा दिली जाते.

महिला विशेष बसचे मार्ग
स्वारगेट ते धायरेश्वर मंदिर, मनपा भवन ते वडगाव शेरी, कोथरूड डेपो ते पुणे स्टेशन, एनडीए गेट क्र.१० ते मनपा भवन, कात्रज ते शिवाजीनगर, कात्रज ते महाराष्ट्र हौसिंग बोर्ड, धनकवडी ते न. ता. वाडी, कात्रज ते कोथरूड डेपो, हडपसर गाडीतळ ते वारजे माळवाडी, भेकराईनगर ते मनपा भवन, हडपसर ते निगडी भक्ती-शक्ती, हडपसर ते कात्रज, स्वारगेट ते हडपसर गाडीतळ, हडपसर ते मांजरी बु., मार्केट यार्ड ते पिंपळे गुरव, लोकशाहीर आण्णा भाऊ साठे स्थानक ते शिवाजीनगर, लोकशाहीर अण्णा भाऊ साठे स्थानक ते पुणे स्टेशन, पुणे स्टेशन ते कोंढवा खुर्द, मनपा भवन ते मुकाई चौक किवळे, निगडी ते मेगापॉलिस हिंजवडी, मनपा भवन ते भोसरी, भोसरी ते हिंजवडी माण फेज ३, भोसरी ते निगडी, भोसरी ते पिंपरी गाव, भोसरी ते चिंचवड गाव, चिखली ते डांगे चौक, भेकराईनगर ते वाघोली, शेवाळेवाडी ते पिंपळे गुरव, शेवाळेवाडी ते कात्रज, मनपा भवन ते म्हाळुंगे गाव.

मेट्रोमध्ये महिलांसह ज्येष्ठ नागरिकांसाठी आता राखीव जागा
नवीन नियोजनानुसार प्रत्येक मेट्रो ट्रेनमध्ये महिलांसाठी ४६, तर ज्येष्ठ नागरिकांसाठी आठ जागा राखीव असतील. पहिल्या डब्यात महिलांसाठी १४ आणि ज्येष्ठ नागरिकांसाठी दोन जागा, मधल्या डब्यात महिलांसाठी १८ आणि ज्येष्ठ नागरिकांसाठी चार, तर तिसऱ्या डब्यात महिलांसाठी १४ आणि ज्येष्ठ नागरिकांसाठी दोन जागा राखीव ठेवण्यात आल्या आहेत. या आसनव्यवस्थेचा सविस्तर आराखडा पुणे मेट्रोच्या सर्व स्थानकांवर; तसेच अधिकृत मोबाइल ॲपवर उपलब्ध करून देण्यात येणार आहे. मेट्रोच्या डब्यांमध्ये दर्शविण्यात आलेल्या चिन्हांद्वारे राखीव जागा स्पष्टपणे दर्शविण्यात येणार असल्याने प्रवाशांना त्या सहज ओळखता येतील. या राखीव जागांच्या नियमांचे पालन करून महिला व ज्येष्ठ नागरिकांना सहकार्य करण्याचे आवाहन ‘महामेट्रो’ प्रशासनाने प्रवाशांना केले आहे.

महिला आणि ज्येष्ठ नागरिकांच्या सुरक्षित प्रवासासाठी महाराष्ट्र मेट्रो रेल कॉर्पोरेशने (महामेट्रो) मेट्रोच्या तिन्ही डब्यांत राखीव जागा ठेवण्याचा निर्णय घेतला आहे. जागतिक महिला दिनाच्या पार्श्वभूमीवर आठ मार्चपासून हा निर्णय लागू करण्यात येणार असल्याची माहिती पुणे मेट्रोकडून देण्यात आली.

वनाझ ते रामवाडी आणि पिंपरी-चिंचवड ते स्वारगेट या मार्गांवर सध्या मेट्रो धावत आहे. मेट्रोमधून सध्या दोन लाखांपेक्षा जास्त प्रवासी प्रवास करतात. यामध्ये महिला व ज्येष्ठ नागरिकांची संख्यादेखील मोठी असते. त्यामुळेच पुणे मेट्रोच्या प्रत्येक ट्रेनमधील तिन्ही डब्यांमध्ये महिला आणि ज्येष्ठ नागरिकांसाठी विशेष आसनव्यवस्था करण्यात आली आहे. त्यामुळे विशेषतः महिला प्रवासी आणि वृद्ध नागरिकांना गर्दीच्या वेळी बसण्याची सोय उपलब्ध होणार असून, त्यांचा प्रवास अधिक सुरक्षित आणि सोयीस्कर होण्यास मदत होणार आहे.