Nashik : नाशिक धर्मांतर प्रकरणातील HR आश्विनी चैनानीला पुण्यातून अटक; पीडितेने तक्रार करताच जाणीवपूर्वक वाढवले जात होते वर्कलोड

Nashik : एका नामांकित बहुराष्ट्रीय कंपनीतील ‘एचआर’ आश्विनी चैनानी (वय ५१, रा. पुणे) हिला नाशिक पोलिसांनी पुण्यातून अटक केली आहे. आठ तरुणींशी संबंधित गंभीर स्वरूपाच्या तक्रारींमध्ये लैंगिक छळ, अत्याचाराचा प्रयत्न आणि धर्मांतराचा प्रयत्न झाल्याचा आरोप आहे. न्यायालयाने तिला १३ एप्रिलपर्यंत पोलिस कोठडी सुनावली आहे.

या प्रकरणात देवळाली कॅम्प आणि मुंबई नाका पोलिस ठाण्यांत एकूण नऊ गुन्हे दाखल असून त्यामध्ये आठ महिला आणि एक पुरुष फिर्यादी आहेत. या प्रकरणात यापूर्वी सहा पुरुष संशयितांना अटक करण्यात आली असून, काहींना न्यायालयीन कोठडी तर काहींना नाशिकरोड मध्यवर्ती कारागृहात पाठवण्यात आले आहे. एका संशयित महिला अद्याप फरार आहे.

दरम्यान, ‘एचआर’ आश्विनी चैनानी हिला कंपनीच्या पुण्यातील कार्यालयातून ताब्यात घेण्यात आले होते. चौकशीनंतर तिला पुन्हा अटक करण्यात आली. तिच्यासोबत इतर संशयितांनाही न्यायालयात हजर करण्यात आले. न्यायालयाने युक्तिवाद ऐकून पाच पुरुष संशयितांना न्यायालयीन कोठडी सुनावली आहे.

तपासात समोर आलेल्या माहितीनुसार, पीडित तरुणी या पदवीधर असून त्यांना १८ ते २२ हजार रुपयांचे वेतन होते. काही पीडितांनी केलेल्या लेखी आणि तोंडी तक्रारींकडे कंपनी व्यवस्थापनाने दुर्लक्ष केल्याचा आरोप आहे. या दुर्लक्षामुळे संबंधितांना अधिक धाडस मिळाल्याचा संशय पोलिसांनी व्यक्त केला आहे.

सध्या नाशिक पोलिसांचे विशेष तपास पथक (SIT) या प्रकरणाचा सखोल तपास करत असून, कंपनीतील इतर अधिकाऱ्यांवरही चौकशीची टांगती तलवार आहे.