कोल्हापूर: दाजीपूर जंगलात पर्यटकांना आले थेट वाघाचे दर्शन; सफारी दरम्यानच्या या थरारक अनुभवाने पर्यटकांमध्ये आनंद

कोल्हापूर: ३४१ चौरस किलोमीटर क्षेत्रफळ असलेल्या दाजीपूर अभरण्यात जंगल सफारी दरम्यान पर्यटकांना वाघाचे दर्शन झाले. रविवारी (दि. १ नोव्हेंबर) जंगल सफारी सुरु झाली आहे. जंगल सफारीसाठी गेलेल्या प्रसाद कोरगावकर या जंगल सफारी जीप चालकांनसह रुकडी येथील पर्यटकांना वाघाचे दर्शन झाल्याने दाजीपूर अभयारण्याचे महत्त्व पुन्हा एकदा अधोरेखित झाले आहे.

जंगल सफारीसाठी वन्यजीव विभागाच्यावतीने वाहन संख्या मर्यादित व निश्चित केल्यामुळे जंगलात मुक्तपणे फिरणाऱ्या वन्य प्राण्यांना होणारा त्रास कमी झाल्याने पर्यटकांना वन्य प्राण्यांचे दर्शन होत आहे. अभयारण्य क्षेत्रात विविध ठिकाणी वीस पाणवठे त्याठिकाणी मारलेले बोर, त्याचे पाणी सोलरद्वारे पानवट्यात भरून वन्य प्राण्यांना पिण्याचे पाण्याची सोय करून दिलेली आहे. त्यामुळे वन्य प्राण्यांचे दर्शन पर्यटकांना होत आहे.

जंगल क्षेत्रात वेळेचे बंधन घालून सकाळी सहा व दुपारी दोन याच काळात मर्यादित वाहने सोडण्याचा निर्णय घेण्यात आला आहे. प्रत्येक वाहनात गाईड तथा मार्गदर्शक सक्तीचे केल्याने मार्गदर्शक यांच्यामार्फत पर्यटकांना वन्यप्राणी निरीक्षणाबाबत व्यवस्थित मार्गदर्शन होत आहे. दुपारी वन्य प्राण्यांच्या विश्रांतीचा काळ असल्यामुळे निर्धारित केलेल्या वेळेत पर्यटकांना वन्य प्राण्यांचे दर्शन होत आहे.