सातारा: सोन्याच्या दागिन्यांची थोरांडी चोरी! बायकोसाठी हार घ्यायचा बहाणा करून फोटो काढण्याच्या बहाण्याने चोरटा १४ लाखांचे सोन्याचे दागिने घेऊन पसार!

सातारा: लग्नाचा वाढदिवस असल्याने पत्नीसाठी सोन्याचा हार खरेदी करण्याच्या बहाण्याने आलेल्या चोरट्याने दागिन्यांचे फोटो काढण्याच्या बहाण्याने १४ लाख रुपयांचे आठ तोळे दागिने घेऊन मित्रासोबत दुचाकीवरून पोबारा केला. पाठलाग करणा-या तरुणांच्या डोळ्यात चटणी टाकून चोरटे नवा रस्ता घाटमार्गे पसार झाले. ही थरारक घटना शुक्रवारी (दि. १५) दुपारी तीनच्या सुमारास ढेबेवाडी (ता. पाटण) येथे भरवस्तीतील मगर बंधू ज्वेलर्समध्ये घडली. याबाबत विनोद मगर यांनी ढेबेवाडी पोलिस ठाण्यात फिर्याद दिली.

घटनास्थळावरून मिळालेल्या माहितीनुसार, ढेबेवाडी बाजारपेठेतील मध्यवस्तीत विनोद मगर यांचे मगर बंधू ज्वेलर्स आहे. शुक्रवारी दुपारी ते स्वतः, त्यांचा मुलगा विराज व दोन कामगार दुकानात होते. दुपारी तीनच्या सुमारास एक तरुण दुकानात दागिने घेण्याच्या बहाण्याने आला. लग्नाच्या वाढदिवसानिमित्त पत्नीसाठी हार घ्यायचा असल्याचे त्याने सांगितले. त्यानुसार दुकानातील कामगार त्याला दागिने दाखवत होता. त्याचवेळी तो व्हिडिओ कॉलवरून कोणालातरी दागिने दाखवत होता.

विराज मगर हा त्याला दागिने दाखवून कागदावर आकडेमोड करत असतानाच चोरटा तीन दागिने घेऊन पळत सुटला. दुकानाबाहेर काही अंतरावर थांबलेल्या दुचाकीस्वारासोबत तो भरधाव वेगाने निघून गेला. चोरीचा प्रकार लक्षात येताच गोरख मोहिते आणि इतर तरुणांनी चोरट्यांचा दुचाकीवरून पाठलाग केला. मात्र, घाटमार्गात पाठलाग करणा-या तरुणांच्या डोळ्यात चटणी टाकून चोरट्यांनी धूम ठोकली.

या घटनेची माहिती मिळताच ढेबेवाडी पोलिसांनी घटनास्थळी पोहोचून पंचनामा केला. परिसरातील सीसीटीव्ही फुटेज, तसेच अन्य पुराव्यांच्या आधारे चोरट्यांचा शोध घेण्याचे काम सुरू आहे. भरदिवसा बाजारपेठेत घडलेल्या धाडशी चोरीच्या घटनेमुळे व्यापारी आणि नागरिकांमध्ये भीतीचे वातावरण निर्माण झाले आहे.

पत्नीसाठी हार घेण्यासाठी आले
चोरट्याने आपण ढेबेवाडी परिसरातील जिंती-सावंतवाडीचा असल्याचे, तसेच माजी सैनिक असल्याचे सांगितले. आज माझ्या लग्नाचा वाढदिवस आहे. पत्नीसाठी हार खरेदी करायचा आहे, असे सांगून दागिन्यांच्या फोटो काढण्याच्या बहाणा करून त्याने पोबारा केला.