270 कोटी बजेट अन् कमाई 600 कोटी, 366 दिवस ओटीटीवर राज्य करणारा चित्रपट, कथा ठरली सुपरहिट

डिजिटल स्ट्रीमिंगच्या युगात एखाद्या चित्रपटाचा प्रवास केवळ बॉक्स ऑफिसपुरता मर्यादित राहत नाही याचं ठळक उदाहरण म्हणजे सालार: पार्ट 1 – सीजफायर हा चित्रपट. थिएटरमध्ये प्रदर्शित झाल्यानंतर या चित्रपटाला समीक्षकांकडून संमिश्र प्रतिक्रिया मिळाल्या. मात्र ओटीटीवर प्रदर्शित झाल्यानंतर त्याने प्रचंड लोकप्रियता मिळवत नवीन विक्रम प्रस्थापित केला.

सुमारे 270 कोटी रुपयांच्या बजेटमध्ये तयार झालेल्या या चित्रपटाने जगभरात तब्बल 617.75 कोटी रुपयांची कमाई केली. भारतातच त्याने 406.45 कोटींचा गल्ला जमवला. चित्रपटाची निर्मिती होम्बले फिल्म्स यांनी केली होती.

‘केजीएफ’नंतर प्रशांत नीलची मोठी झेप

दिग्दर्शक प्रशांत नील यांनी केजीएफ फ्रँचायझीमुळे मोठी फॅन फॉलोइंग मिळवली. त्यानंतर त्यांनी या चित्रपटात प्रभासला मुख्य भूमिकेत घेत भव्यदिव्य अॅक्शन ड्रामा सादर केला. चित्रपटात पृथ्वीराज सुकुमारन, श्रुति हासन, जगपति बाबू, बॉबी सिम्हा आणि श्रेया रेड्डी यांनी महत्त्वाच्या भूमिका साकारल्या आहेत. संगीत दिग्दर्शन रवि बसुर यांनी केलं.

‘सालार: पार्ट 1’ची कथा ‘खानसार’ या काल्पनिक शहर-राज्यावर आधारित आहे. जिथे अजूनही राजशाही व्यवस्था अस्तित्वात आहे. निर्वासित राजकुमार देवा (प्रभास) आणि विद्यमान राजकुमार वरधा (पृथ्वीराज सुकुमारन) यांची मैत्री ही कथानकाचा गाभा आहे. सत्तापालटाच्या कटकारस्थानांमुळे वरधाला सिंहासन मिळवण्यासाठी देवाची मदत घ्यावी लागते आणि त्यातून उलगडतो एक भव्य संघर्ष.

ओटीटीवर सलग 366 दिवस ट्रेंडिंग

थिएटरनंतर हा चित्रपट तेलुगू, तमिळ, मल्याळम, कन्नड आणि हिंदी भाषांमध्ये जिओ हॉटस्टारवर प्रदर्शित झाला. ओटीटीवर प्रदर्शित झाल्यानंतर चित्रपटाला प्रेक्षकांकडून जबरदस्त प्रतिसाद मिळाला. तो तब्बल 366 दिवस प्लॅटफॉर्मच्या ट्रेंडिंग यादीत कायम राहिला. या यशानंतर प्रभासने सोशल मीडियावर चाहत्यांचे आभार मानले.

चित्रपटाच्या सिक्वेलचं नाव सालार: पार्ट 2 – शौर्यंगा पर्वम असं जाहीर करण्यात आलं आहे. 2024 मध्ये या चित्रपटाचं शूटिंग सुरू झालं असून दिग्दर्शनाची धुरा पुन्हा प्रशांत नील यांच्याकडेच आहे. प्रभास आणि पृथ्वीराज सुकुमारन पुन्हा एकदा मुख्य भूमिकांमध्ये दिसणार आहेत. मात्र इतर कलाकार आणि कथानकाबाबतची माहिती अद्याप गुप्त ठेवण्यात आली आहे. रिलीज डेटबाबतही अधिकृत घोषणा झालेली नाही.