थेट ACP ऑफिसमध्ये घुसला 5.5 फुटांचा विषारी कोब्रा, बघताच महिला कर्मचाऱ्याने थेट…, अर्धा तास चालला थरार

Kalyan News : सध्या सोशल मीडियावर मोठ्या प्रमाणात व्हिडीओ व्हायरल होत असतात. यामध्ये रेल्वेमधील हाणामारी असेल किंवा रेल्वेमध्ये दिसणाऱ्या इतर काही गोष्टी असतील. या अशा घटनांचे व्हिडीओ काही क्षणातच सोशल मीडियावर प्रचंड व्हायरल होत असतात. अशातच आता असाच एक व्हिडीओ सध्या सोशल मीडियावर प्रचंड व्हायरल झाला आहे.

कल्याण पश्चिमेतील आंबेडकर रोड परिसरात असलेल्या ACP कार्यालय, कल्याण पश्चिम येथे सोमवारी दुपारच्या सुमारास एक धक्कादायक घटना घडली. सुमारे साडेपाच फूट लांबीचा अतिविषारी इंडियन कोब्रा (नाग) अचानक कार्यालयात शिरल्याने कर्मचाऱ्यांमध्ये एकच खळबळ उडाली.

महिला कर्मचाऱ्यांची धावपळ

अचानक कोब्रा दिसताच कार्यालयातील कर्मचारी घाबरून गेले. विशेषतः एका कक्षात काम करणाऱ्या महिला पोलिस कर्मचाऱ्यांनी तात्काळ दरवाजा बंद करून स्वतःला सुरक्षित केले. जवळपास अर्धा तास त्या खोलीतच कोंडून घेत त्यांनी बाहेर परिस्थिती नियंत्रणात येण्याची वाट पाहिली. दरम्यान, हा कोब्रा एसीपींच्या मुख्य कक्षाच्या दिशेने सरकत असल्याचे लक्षात येताच इतर कर्मचाऱ्यांनीही सुरक्षित स्थळी धाव घेतली.

सुदैवाने घटनेच्या वेळी संबंधित एसीपी कार्यालयात उपस्थित नव्हते. त्यामुळे संभाव्य मोठा धोका टळला. या घटनेची माहिती मिळताच स्थानिक सर्पमित्र तात्काळ घटनास्थळी दाखल झाले. त्यांनी अत्यंत दक्षतेने आणि कौशल्याने त्याला पकडले. सुमारे 20 वर्षांच्या अनुभवात इतक्या गजबजलेल्या शासकीय कार्यालयात एवढा मोठा आणि विषारी कोब्रा आढळणे दुर्मिळ असल्याचे सर्पमित्रांनी सांगितले.

कार्यालयात कसा आला कोब्रा?

कोब्रा नेमका कार्यालयात कसा शिरला याबाबत अद्याप स्पष्टता नाही. परिसरातील झाडाझुडपांतून किंवा गटारमार्गे तो आत शिरला असावा असा प्राथमिक अंदाज व्यक्त केला जात आहे. रेस्क्यू केल्यानंतर कोब्राला वन विभागाच्या ताब्यात देण्यात आले असून आवश्यक प्रक्रिया पूर्ण करून त्याला जंगलात सोडण्यात येणार असल्याची माहिती देण्यात आली.

थेट ACP ऑफिसमध्ये घुसला 5.5 फुटांचा विषारी कोब्रा, बघताच महिला कर्मचाऱ्याने थेट…, अर्धा तास चालला थरार pic.twitter.com/97ErXW4NvU

— TV9 Marathi (@TV9Marathi) February 21, 2026

स्टेशनलगतच्या मध्यवर्ती आणि गजबजलेल्या भागात घडलेल्या या घटनेमुळे काही काळ तणावाचे वातावरण निर्माण झाले होते. मात्र सर्पमित्रांच्या वेळेवर हस्तक्षेपामुळे मोठा अनर्थ टळला आणि कर्मचाऱ्यांनी सुटकेचा निश्वास सोडला.