सोलापूरकरांसाठी मोठी बातमी! १ ऑक्टोबरपासून २० ई-बस २४ मार्गांवर धावणार, प्रवाशांना मिळणार आधुनिक सुविधा

सोलापूर: सोलापूर शहराच्या सार्वजनिक प्रवासी वाहतूक व्यवस्थेला अधिक बळकट आणि पर्यावरणपूरक बनवण्यासाठी प्रशासनाकडून महत्त्वपूर्ण पाऊल उचलण्यात आले आहे. केंद्र सरकारच्या 'पीएम ई-बस सेवा' योजनेंतर्गत सोलापूर महापालिकेला पहिल्या टप्प्यात २० इलेक्ट्रिक बस (ई-बस) प्राप्त झाल्या आहेत. या नवीन ई-बस आगामी १ ऑक्टोबरपासून सोलापूर शहर आणि ग्रामीण भागातील एकूण २४ प्रमुख मार्गांवर प्रवाशांच्या सेवासाठी प्रत्यक्षात धावणार आहेत.

महापालिकेच्या परिवहन विभागाकडून मिळालेल्या सविस्तर माहितीनुसार, या योजनेअंतर्गत डिसेंबरअखेरपर्यंत आणखी २० नवीन ई-बस महापालिकेच्या ताफ्यात दाखल होणार आहेत. पहिल्या टप्प्यात आलेल्या या आधुनिक बसगाड्यांमुळे सोलापूरकरांना प्रदूषणमुक्त, आरामदायी आणि ह्युमन-फ्रेंडली प्रवास अनुभवता येणार आहे. प्रवाशांच्या सुरक्षेचा विचार करून प्रत्येक बसमध्ये सीसीटीव्ही कॅमेरे आणि इतर आधुनिक यंत्रणा बसविण्यात आली आहे.

२४ प्रमुख मार्गांवर धावणार गाड्या

सोलापूर शहरांतर्गत तसेच ग्रामीण परिसरातील प्रवाशांची सोय डोळ्यांसमोर ठेवून २४ नव्या मार्गांची आखणी करण्यात आली आहे. शहरातील राजस्वनगर, नई जिंदगी, कन्ना चौक, राजेंद्र चौक, बाजार समिती, जुना विडी घरकूल, ज्ञानेश्वरनगर, साखर कारखाना, देसाईनगर, रे-नगर, सैफूल, आसरा चौक आणि सोरेगाव या महत्त्वाच्या शहरी मार्गांवर या ई-बस सेवा देतील. याशिवाय, ग्रामीण भागातील प्रवाशांच्या सोयीसाठी पानमंगरूळ, मंद्रुप, विंचूर, औराद, मोहोळ, कासेगाव, बोरामणी, चपळगाव, मुस्ती, हत्तरसंग कुडल, मार्डी, वडगाव आणि वडाळा या मार्गांवरही या बस नियमित फेऱ्या मारणार आहेत.