पश्चिम बंगाल: ममता बॅनर्जींच्या कुटुंबावर दुःखाचा डोंगर! भाचीचा राहत्या घरी संशयास्पद मृत्यू; नोकरी गेल्यामुळे आणि घटस्फोटाच्या प्रकरणामुळे होती तणावात

पश्चिम बंगाल: एक धक्कादायक आणि खळबळजनक घटना समोर आली आहे. पश्चिम बंगालच्या मुख्यमंत्री ममता बॅनर्जी यांच्या दूरच्या नातेवाईक (भाची) वृष्टी मुखर्जी (वय २८) यांचा बीरभूम जिल्ह्यातील घरी संशयास्पद परिस्थितीत मृतदेह आढळून आला आहे. त्या रामपुरहाट येथील कुसुमबा गावात राहत होत्या. मंगळवारी सकाळी त्यांच्या घराच्या दुसऱ्या मजल्यावरील खोलीत त्या मृतावस्थेत आढळल्या. या घटनेमुळे परिसरात मोठी खळबळ उडाली आहे.माहिती मिळताच रामपुरहाट पोलिसांनी घटनास्थळी पोहोचून खोली सील केली आणि मृतदेह ताब्यात घेऊन शवविच्छेदनासाठी रामपुरहाट सरकारी वैद्यकीय महाविद्यालयात पाठवला आहे.

एसएससी भरती घोटाळ्यात गेली होती नोकरी
वृष्टी मुखर्जी या बोलपूर येथील एका उच्च प्राथमिक विद्यालयात 'नॉन टीचिंग' (ग्रुप-सी क्लर्क) पदावर कार्यरत होत्या. मात्र, २०१६ च्या पश्चिम बंगाल स्कूल सर्व्हिस कमिशनच्या बहुचर्चित शिक्षक व कर्मचारी भरती घोटाळ्यात त्यांचे नाव समोर आले होते. कलकत्ता उच्च न्यायालयाने भरती प्रक्रियेत अनियमितता आढळल्याने रद्द केलेल्या सुमारे २६,००० पदांमध्ये वृष्टी यांच्याही नियुक्तीचा समावेश होता. रद्द करण्यात आलेल्या अधिकृत सरकारी कर्मचाऱ्यांच्या यादीत वृष्टी मुखर्जी यांचे नाव ६०८ व्या क्रमांकावर होते. सर्वोच्च न्यायालयानेही उच्च न्यायालयाचा हा निर्णय कायम ठेवला होता.

राजीनामा आणि बेरोजगारी
न्यायालयाच्या आदेशानंतर आणि नोकरीवर टांगती तलवार आल्यानंतर त्यांनी स्वतःहूनही राजीनामा दिला होता. मार्च २०२३ मध्ये नोकरी गमावल्यामुळे त्यांना मोठा मानसिक धक्का बसला होता.

घटस्फोटाचा खटला आणि तीव्र नैराश्य
वृष्टी मुखर्जी या ममता बॅनर्जीचे मामा आणि नेते निहार मुखर्जी यांच्या कन्या होत्या. कौटुंबिक आणि वैयक्तिक आयुष्यात त्या गेल्या काही काळापासून मोठ्या तणावात होत्या. त्या गेल्या काही महिन्यांपासून पतीपासून विभक्त राहत होत्या आणि न्यायालयात त्यांच्या घटस्फोटाचा खटला सुरू होता. नोकरी जाणे आणि वैवाहिक आयुष्यातील वाद या दुहेरी संकटामुळे त्या तीव्र नैराश्यात होत्या आणि त्यांच्यावर मानसोपचारही सुरू होते, अशी माहिती कुटुंबीयांनी पोलिसांना दिली आहे.
पोलिसांकडून सर्व बाजूंनी तपास सुरू घटनास्थळाचा पंचनामा करून पोलिसांनी कुटुंबीय आणि शेजाऱ्यांचे जबाब नोंदवण्यास सुरुवात केली आहे. प्राथमिक तपासात नैराश्यातून हे आत्मघातकी पाऊल उचलल्याचा संशय असला, तरी शवविच्छेदन आणि व्हिसेरा तपासणीचा अहवाल आल्यानंतरच मृत्यूचे नेमके कारण स्पष्ट होईल, असे पोलीस अधिकाऱ्यांनी सांगितले आहे.