समृद्धी महामार्गावर थरार! सिन्नर जवळ वकिलाच्या कुटुंबाला घेरून मारहाण, १८ लाखांचे सोने अन् रोकड लुटली; गोळीबारानंतर दरोडेखोर पसार

मुंबई-नागपूर समृद्धी महामार्गावर सुरक्षेचा प्रश्न पुन्हा एकदा ऐरणीवर आला असून, सिन्नर तालुक्यातील मलढोण शिवारात गुरुवारी (ता. २८) मध्यरात्री साडेअकराच्या सुमारास एक अत्यंत थरारक आणि गंभीर दरोड्याची घटना घडली. चालत्या वाहनाचे टायर पंक्चर करून प्रवाशांना बेदम मारहाण करत सुमारे १८ लाख ९ हजार ५०० रुपयांचा ऐवज लुटल्याची धक्कादायक घटना समोर आली आहे. या प्रकरणी सिन्नर पोलीस ठाण्यात गुन्हा दाखल करण्यात आला असून, महामार्गावरील या वाढत्या गुन्हेगारीमुळे प्रवाशांमध्ये भीतीचे वातावरण पसरले आहे.

मिळालेल्या सविस्तर माहितीनुसार, एका वकिलाचे कुटुंब समृद्धी महामार्गावरून प्रवास करत असताना मलढोण शिवाराजवळ त्यांच्या कारचे टायर अचानक पंक्चर झाले. टायर बदलण्यासाठी त्यांनी आपले वाहन महामार्गावर थांबवले. याच संधीचा फायदा घेऊन दबा धरून बसलेल्या तब्बल ११ ते १२ जणांच्या सशस्त्र दरोडेखोरांच्या टोळीने अंधाराचा लाभ घेत त्यांच्यावर हल्ला चढवला. दरोडेखोरांनी वाहनचालक आणि प्रवाशांना बेदम मारहाण केली. एवढेच नव्हे तर दहशत निर्माण करण्यासाठी हवेत गोळीबारही करण्यात आला, ज्यामुळे प्रवाशांमध्ये भीतीचे वातावरण निर्माण झाले.

या हल्ल्यादरम्यान दरोडेखोरांनी प्रवाशांच्या ताब्यातील सुमारे २७.८ तोळे वजनाचे सोन्याचे दागिने आणि ८४ हजार ५०० रुपये रोख रक्कम असा एकूण १८ लाख ९ हजार ५०० रुपयांचा ऐवज बळकावला. दरोडा टाकल्यानंतर मारेकऱ्यांनी अंधाराचा फायदा घेत घटनास्थळावरून पोबारा केला. घटनेची माहिती मिळताच सिन्नर पोलिसांनी तात्काळ घटनास्थळी धाव घेतली आणि परिसराची नाकाबंदी करत कसून शोधमोहीम सुरू केली आहे. समृद्धी महामार्गावर रात्रीच्या वेळी होणाऱ्या अशा धाडसी चोऱ्या आणि दरोड्यांमुळे रात्रीचा प्रवास करणाऱ्या नागरिकांच्या सुरक्षेचा प्रश्न गंभीर बनला असून, पोलिसांनी लवकरात लवकर या कुख्यात टोळीचा पर्दाफाश करावा, अशी मागणी केली जात आहे.