झिशान सिद्दिकी यांचा अजित पवारांच्या राष्ट्रवादीत प्रवेश; वांद्रे पूर्व मतदारसंघातून उमेदवारी जाहीर

मुंबई: महाराष्ट्राच्या राजकारणात मोठी उलथापालथ पाहायला मिळत असून, माजी आमदार बाबा सिद्दिकी यांचे पुत्र आणि काँग्रेसचे बडतर्फ आमदार झिशान सिद्दिकी यांनी अखेर अधिकृतपणे राष्ट्रवादी काँग्रेस (अजित पवार गट) मध्ये प्रवेश केला आहे.
या पक्षप्रवेशानंतर पक्षाने त्यांना वांद्रे पूर्व विधानसभा मतदारसंघातून आपली उमेदवारीही जाहीर केली आहे.

काही महिन्यांपूर्वी झालेल्या विधान परिषद निवडणुकीत क्रॉस वोटिंग केल्याच्या आरोपावरून काँग्रेसने झिशान सिद्दिकी यांची पक्षातून हकालपट्टी केली होती. तेव्हापासूनच ते अजित पवार यांच्या गटात सामील होतील, अशी दाट शक्यता वर्तवली जात होती.
दसऱ्याच्या सुमारास त्यांचे वडील बाबा सिद्दिकी यांची हत्या झाल्यानंतर झिशान यांनी महाविकास आघाडीवर तीव्र शब्दांत टीका केली होती. काँग्रेस आणि महाविकास आघाडीने आपल्याला कठीण काळात वाऱ्यावर सोडल्याचा आरोप त्यांनी केला होता.

आज उपमुख्यमंत्री अजित पवार, प्रफुल्ल पटेल आणि सुनील तटकरे यांच्या उपस्थितीत झिशान सिद्दिकी यांनी राष्ट्रवादीचे घड्याळ हाती घेतले. यावेळी बोलताना झिशान भावूक झाले होते. "माझ्या वडिलांचे अपूर्ण स्वप्न पूर्ण करण्यासाठी आणि वांद्रे पूर्वच्या जनतेच्या हक्कासाठी मी ही निवडणूक लढवणार आहे. महाविकास आघाडीने मला फसवले, पण अजित दादांनी माझ्यावर विश्वास दाखवला," असे त्यांनी यावेळी नमूद केले.

आगामी विधानसभा निवडणुकीत वांद्रे पूर्व मतदारसंघात आता झिशान सिद्दिकी विरुद्ध शिवसेना (ठाकरे गट) उमेदवार वरुण सरदेसाई यांच्यात चुरशीची लढत पाहायला मिळणार आहे. राष्ट्रवादी काँग्रेसने आपल्या दुसऱ्या उमेदवारी यादीत झिशान यांच्यासह नवाब मलिक यांच्या कन्या सना मलिक यांनाही उमेदवारी जाहीर केली आहे.