मिर्झापूरमधील महिला यूट्यूबरचा बनाव उघड; पोलिसांना खोट्या गुन्ह्यात अडकवण्यासाठी रचला कट

मिर्झापूर: उत्तर प्रदेशातील मिर्झापूर जिल्ह्यातून एक खळबळजनक घटना समोर आली आहे. एका महिला यूट्यूबरने पोलिसांवर दबाव आणण्यासाठी आणि त्यांना खोट्या गुन्ह्यात अडकवण्यासाठी स्वतःच्याच अपहरणाचा आणि हत्येच्या प्रयत्नाचा बनाव रचल्याचे तपासात उघड झाले आहे. या प्रकरणी पोलिसांनी महिला यूट्यूबरसह तिच्या सहा साथीदारांना अटक केली आहे.

नेमकी घटना काय?
चुनार येथील रहिवासी आणि स्वतःला पत्रकार म्हणवून घेणारी यूट्यूबर सरिता सिंह पटेल ४ मे रोजी बेपत्ता झाली होती. त्यानंतर ६ मे रोजी ती राजगड पोलीस ठाण्याच्या हद्दीत अत्यंत गंभीर अवस्थेत सापडली. तिचे हात-पाय बांधलेले होते आणि अंगावर पेट्रोल ओतले होते. तिने असा दावा केला होता की काही लोकांनी तिचे अपहरण करून तिला जीवे मारण्याचा प्रयत्न केला.

कसा उघड झाला बनाव?
पोलिसांनी या प्रकरणाचा तपास सुरू केला असता त्यांना सरिताच्या सांगण्यात विसंगती आढळली. सीसीटीव्ही फुटेज तपासले असता, सरिता एका ओळखीच्या व्यक्तीच्या दुचाकीवर बसून आरामात जाताना दिसली. तसेच ती रेल्वे स्टेशनवर फिरतानाही कॅमेऱ्यात कैद झाली. पोलिसांनी कसून चौकशी केली असता तिने आपला गुन्हा कबूल केला.

कारवाईचे कारण:
सरिताने पोलिसांना सांगितले की, चुनार पोलिसांनी काही लोकांवर कारवाई करून त्यांना तुरुंगात पाठवले होते, ज्याचा तिला राग होता. पोलिसांना अद्दल घडवण्यासाठी आणि त्यांच्याकडून पैसे उकळण्यासाठी तिने आपल्या कुटुंबातील सदस्यांच्या मदतीने हा अपहरणाचा 'ड्रामा' रचला होता. याप्रकरणी पोलिसांनी सर्व आरोपींविरुद्ध गुन्हा दाखल करून त्यांची रवानगी तुरुंगात केली आहे.