Pune–Nashik Railway : पुणे-नाशिक रेल्वे मार्गात मोठा बदल! रेल्वे मंत्र्यांसमोर नवा प्रस्ताव; नवा मार्ग कसा असेल?

Pune–Nashik Railway : रखडलेला पुणे-नाशिक सेमी हायस्पीड रेल्वेमार्ग प्रकल्प मार्गी लावण्यासाठी नाशिक ते शिर्डी अशी नवी मार्गिका टाकून ती पुढे सध्याची चाकण औद्योगिक वसाहत व नवीन पुणे-अहिल्यानगर या मार्गाला जोडावी, असा नवा तोडगा या भागातील काही खासदारांनी रेल्वेमंत्री अश्विनी वैष्णव यांच्यासमोर मांडला आहे.

नाशिक-पुणे असा संपूर्ण नवीन रेल्वेमार्ग तयार करण्याचा वेळ व खर्चही या नव्या तोडग्यामुळे वाचेल, असेही या खासदारांचे म्हणणे आहे. मात्र यालाही पुणे जिल्ह्यातून राजकीय विरोध होण्याची शक्यता लक्षात घेता, हा मार्गही रखडण्याचीच चिन्हे आहेत.

Mumbai–Pune Expressway Accident : एक्सप्रेसवेवर भीषण अपघात! ट्रकचे ब्रेक निकामी, चालकाचा जागीच मृत्यू

महाराष्ट्र रेल्वे विकास महामंडळाने तयार केलेले पुणे-नाशिक रेल्वेमार्गाचे मूळ संरेखन (अलाइन्मेंट) रद्द करून, साईनगर शिर्डी-नाशिक असा मार्ग निश्चित करण्यात आल्याचे रेल्वेमंत्री अश्विनी वैष्णव यांनी नुकतेच जाहीर केल्यावर, त्याला विरोध सुरू झाला. राष्ट्रवादी काँग्रस शप पक्षाचे खासदार डॉ. अमोल कोल्हे यांनी लोकसभेत नुकताच याला विरोध केला. राज्यातील खासदारांच्या शिष्टमंडळाने मंत्री वैष्णव यांची भेट घेऊन या रेल्वेमार्गाच्या संरेखनाचा पुनर्विचार करण्याबाबतचे निवेदन त्यांना दिले. या चर्चेत खासदारांनी हा प्रकल्प लवकर मार्गी लावण्याची मागणी केली.

शिवसेना उबाठाचे लोकसभेतील गटनेते अरविंद सावंत तसेच अनिल देसाई, शिर्डीचे भाऊसाहेब वाकचौरे, डॉ. अमोल कोल्हे, भास्कर भगरे, राजाभाऊ वाजे आदींसह या निवेदनावर खासदार भाऊसाहेब वाकचौरे, अनिल देसाई, संजय जाधव, विशाल पाटील, बजरंग सोनवणे, अमर काळे, नीलेश लंके, धैर्यशील मोहिते पाटील आदींच्या स्वाक्षऱ्या आहेत.

नाशिक-पुणे रेल्वे मार्ग सिन्नर-संगमनेरमार्गेच व्हावा, या मागणीसाठी सिन्नर येथे झालेल्या सर्वपक्षीय सहविचार सभेतून आक्रमक भूमिका मांडण्यात आली. सिन्नर मार्ग डावलण्याचे प्रयत्न सुरू राहिल्यास तीव्र जनआंदोलन छेडण्यात येईल, असा स्पष्ट इशारा यावेळी देण्यात आला.