अमेरिका: वायू दलाचे शक्तिशाली 'B-52 बॉम्बर' विमान कोसळले; ८ जणांचा होरपळून मृत्यू.

अमेरिका: अमेरिकेतील दक्षिण कॅलिफोर्नियाच्या मोजावे वाळवंटात असलेल्या प्रसिद्ध 'एडवर्ड्स एअर फोर्स बेस'वर सोमवारी (१५ जून) एक अत्यंत भीषण अपघात घडला. अमेरिकन वायू दलाचे अत्यंत शक्तिशाली आणि महाकाय मानले जाणारे 'B-52 स्ट्रॅटोफोर्ट्रेस' बॉम्बर विमान उड्डाण केल्यानंतर अवघ्या काही वेळातच कोसळले. या अपघातात विमानातील सर्व ८ जणांचा जागीच दुर्दैवी मृत्यू झाला आहे.

नेमकी घटना कशी घडली? मिळालेल्या माहितीनुसार, हे विमान सोमवारी सकाळी ११ वाजून २० मिनिटांच्या सुमारास 'रूटीन टेस्ट मिशन'साठी उड्डाण करत होते. मात्र, एडवर्ड्स एअर फोर्स बेसवरून टेक-ऑफ केल्यानंतर काही वेळातच ते रनवेच्या जवळ असलेल्या वाळवंटी भागात कोसळले. विमान जमिनीवर आदळताच त्यामध्ये भीषण आग लागली आणि आगीचे लोळ आकाशात पसरले.

 

विमानाचे झाले तकडे: अपघातानंतर हवाई पाहणीतून समोर आलेल्या दृश्यांमध्ये विमानाचा अक्षरशः कोळसा झाल्याचे दिसून आले. वाळवंटात विमानाचे अस्तित्वच संपले असून, आगीमुळे जमिनीचा मोठा भाग काळा पडला आहे. लष्कराच्या आपत्कालीन पथकांनी घटनास्थळी धाव घेतली, परंतु आगीची तीव्रता इतकी होती की, कोणालाही वाचवणे शक्य झाले नाही. मृतांमध्ये कोणाचा समावेश?एडवर्ड्स एअर फोर्स बेसच्या अधिकाऱ्यांनी दिलेल्या माहितीनुसार, या विमानामध्ये लष्करी कर्मचारी, सरकारी अधिकारी आणि खाजगी कंत्राटदार (Contractors) असा 'मिक्स्ड क्रू' होता. बॉइंग कंपनीने देखील या दुर्घटनेत त्यांच्या दोन कर्मचाऱ्यांचा मृत्यू झाल्याची पुष्टी केली आहे.

सध्या अपघाताचे नेमके कारण स्पष्ट झालेले नाही. लष्कराने या प्रकरणाच्या चौकशीसाठी एक टीम नेमली असून, पुढील सहा महिने या प्रकरणाचा सखोल तपास केला जाऊ शकतो, असे संकेत देण्यात आले आहेत. B-52 चे महत्त्व:'B-52 स्ट्रॅटोफोर्ट्रेस' हे अमेरिकेच्या ताकदीचे प्रतीक मानले जाते. १९५५ मध्ये हे विमान अमेरिकन सैन्यात सामील झाले असून, ते अण्वस्त्रांसह पारंपारिक बॉम्ब वाहून नेण्यास सक्षम आहे. अनेक दशकांपासून हे विमान अमेरिकेच्या ताफ्यातील एक महत्त्वाचा भाग राहिले आहे.

या दुर्घटनेमुळे अमेरिकन हवाई दलावर शोककळा पसरली असून, एडवर्ड्स एअर फोर्स बेसवर सर्व उड्डाणे तात्पुरती स्थगित करण्यात आली आहेत.