बीड: जादूटोण्याची भीती दाखवून महिलेची लाखो रुपयांची फसवणूक; त्र्यंबकेश्वरच्या दोन ठगांवर बीडमध्ये गुन्हा दाखल

बीड: इन्स्टाग्रामवर ओळख करून देव-देवतांच्या नावाने विश्वास संपादन केला. त्यानंतर जादूटोणा करून आयुष्य उद्ध्वस्त करण्याची आणि पतीला जिवे मारण्याची भीती दाखवून बीड शहरातील एका गृहिणीकडून तब्बल १ लाख ३७ हजार रुपये उकळल्याचा प्रकार उघडकीस आला आहे. या प्रकरणी त्र्यंबकेश्वर (जि. नाशिक) येथील दोन ठगांवर बीडच्या शिवाजीनगर पोलिस ठाण्यात रविवारी (२ ऑगस्ट) गुन्हा दाखल करण्यात आला आहे.

बीड शहरातील अंबिका चौक परिसरातील रहिवासी असलेल्या उषा खामकर (वय ३१) यांची दीड महिन्यापूर्वी 'श्री स्वामी समर्थ' नावाच्या इन्स्टाग्राम अकाउंटवरून सागर जोशी व जिगर गजानन जोशी यांच्याशी ओळख झाली होती.सुरुवातीला त्यांनी देव-देवतांशी संबंधित धार्मिक माहिती देऊन गृहिणीचा विश्वास संपादन केला. त्यानंतर विविध कारणे सांगून पैसे मागण्यास सुरुवात केली.

पतीला जीवे मारीन !
'पैसे दिले नाहीस तर तुझ्यावर जादूटोणा करून तुझे आयुष्य उद्ध्वस्त करीन, तुझ्या पतीला जिवे मारून टाकीन अन् तुला भीक मागण्याची वेळ आणीन,' अशी सतत भीती फोनवरून घातल्यामुळे गृहिणी प्रचंड घाबरली. या भीतीपोटी तिने टप्प्याटप्प्याने तब्बल १ लाख ३७ हजार रुपये दिले.

मानसिक खच्चीकरण...
गृहिणीने पैसे देण्यास नकार दिल्यावर त्यांनी खरा चेहरा दाखवत धमक्या देण्यास सुरुवात केली. सततच्या आर्थिक व मानसिक शोषणाला कंटाळून अखेर गृहिणीने शिवाजीनगर पोलिस ठाणे गाठून आपबीती सांगितली. यावरून सागर व जिगर जोशीवर गुन्हा दाखल झाला.