छत्रपती संभाजीनगर: हजारो पदे रिक्त, कामगारांवर ताण! प्रलंबित पदोन्नती अन् भरतीसाठी छत्रपती संभाजीनगरच्या घाटी रुग्णालयातील परिचारिका रस्त्यावर

छत्रपती संभाजीनगर: प्रसिद्ध शासकीय वैद्यकीय महाविद्यालय व रुग्णालय (घाटी) मधील परिचारिकांनी विविध प्रलंबित मागण्यांसाठी आक्रमक भूमिका घेत आज दोन तासांचे 'काम बंद' आंदोलन पुकारले आहे. रुग्णालयात मोठ्या प्रमाणावर परिचारिकांची पदे रिक्त असल्यामुळे कार्यरत कर्मचाऱ्यांवर कामाचा प्रचंड ताण येत आहे. याशिवाय प्रलंबित पदोन्नती, नवीन भरती प्रक्रिया आणि इतर महत्त्वाच्या मागण्यांकडे शासनाचे लक्ष वेधण्यासाठी महाराष्ट्र गव्हर्नमेंट नर्सेस फेडरेशनच्या नेतृत्वाखाली हे आंदोलन करण्यात आले.

सकाळी ठरलेल्या वेळेत परिचारिकांनी आपले नियमित काम थांबवून रुग्णालयातील परिसर आणि संबंधित विभागांमध्ये राज्य सरकारविरुद्ध जोरदार घोषणाबाजी केली. प्रशासनाकडून वारंवार आश्वासने देऊनही मागण्यांची पूर्तता होत नसल्याने नर्सेसमध्ये संतापाचे वातावरण पाहायला मिळाले. या आंदोलनामुळे घाटी रुग्णालयातील आरोग्य सेवा काही काळासाठी विस्कळीत झाली असून याचा नाहक त्रास रुग्णांना सहन करावा लागला.

दरम्यान, जर शासनाने आणि रुग्णालय प्रशासनाने या आंदोलनाची गंभीर दखल घेऊन लवकरात लवकर योग्य तो निर्णय घेतला नाही, तर भविष्यात अधिक तीव्र स्वरूपात बेमुदत संप पुकारला जाईल, असा सज्जड इशारा यावेळी आंदोलक परिचारिकांनी दिला आहे. रिक्त पदांमुळे आधीच मेटाकुटीस आलेल्या आरोग्य यंत्रणेत या आंदोलनामुळे मोठी खळबळ उडाली आहे.