ओडिशा: स्वातंत्र्यदिनाच्या तयारीदरम्यान बालासोरमध्ये मोठी दुर्घटना; शॉक लागून शिक्षकाचा जागीच मृत्यू, तीन विद्यार्थी गंभीर जखमी

ओडिशा: बालासोर जिल्ह्यातील सिमुलिया ब्लॉकमध्ये शुक्रवारी स्वातंत्र्यदिन सोहळ्याच्या तयारीदरम्यान एक अत्यंत वेदनादायी घटना घडली आहे. विजेचा धक्का लागल्याने एका शिक्षकाचा मृत्यू झाला, तर तीन विद्यार्थी गंभीर जखमी झाले आहेत. या दुर्घटनेनंतर घटनास्थळी प्रचंड गोंधळ उडाला. प्रियव्रत बेहरा असं मृत्यू झालेल्या शिक्षकाचं नाव आहे. ते सिमुलियातील मैतापूर परिसरातील 'रॉयल हायस्कूल' आणि 'रॉयल पब्लिक स्कूल' या खासगी शाळेत शिक्षक म्हणून कार्यरत होते.

मिळालेल्या माहितीनुसार, शुक्रवारी सकाळी ८ वाजताच्या सुमारास ही घटना घडली. स्वातंत्र्यदिन सोहळ्याच्या तयारीचा भाग म्हणून शाळा परिसरात झेंडावंदनासाठीचा स्टँड तयार केला जात होता. याच दरम्यान प्रियब्रत बेहरा लोखंडी पाईप बसवण्याचा प्रयत्न करत होते. तेव्हा तो पाईप वरून जाणाऱ्या विजेच्या उच्चदाब तारेच्या संपर्कात आला. तारेचा स्पर्श होताच बेहरा यांना विजेचा जोरदार धक्का बसला आणि ते गंभीर जखमी झाले.

 

 

शाळा परिसरात शोककळा
घटनेनंतर लगेचच त्यांना उपचारासाठी भद्रक मेडिकल कॉलेज आणि हॉस्पिटलमध्ये दाखल करण्यात आलं, परंतु डॉक्टरांनी तपासणीनंतर त्यांना मृत घोषित केलं. या दुर्घटनेत तीन विद्यार्थीही जखमी झाले. विजेचा धक्का लागल्यामुळे त्यांची प्रकृती चिंताजनक असल्याचे सांगण्यात येत आहे.तिन्ही जखमी विद्यार्थ्यांना तातडीने सिमुलिया मेडिकल सेंटरमध्ये दाखल करण्यात आलं असून त्यांच्यावर उपचार सुरू आहेत. या घटनेनंतर शाळा परिसरात शोकाकुल वातावरण आहे. सर्वांनाच मोठा धक्का बसला आहे.