मुंबईत मोठी दुर्घटना: साकीनाक्यात २५ फूट खोल मॅनहोलमध्ये तरुण कोसळला; शोधमोहीम सुरू!

मुंबई: साकीनाक्यात २५ फूट खोल मॅनहोलमध्ये व्यक्ती कोसळली; प्रशासनाचे निष्काळजीपण पुन्हा चव्हाट्यावर मुंबईत सुरू असलेल्या मुसळधार पावसामुळे अनेक सखल भागांत पाणी तुंबले असून, नागरिकांना मोठ्या गैरसोयींचा सामना करावा लागत आहे. अशातच साकीनाका परिसरातून एक अत्यंत धक्कादायक आणि गंभीर घटना समोर आली आहे. येथील एका उघड्या मॅनहोलमध्ये एक अज्ञात व्यक्ती कोसळल्याची माहिती मिळताच परिसरात एकच खळबळ उडाली आहे. हा मॅनहोल तब्बल २० ते २५ फूट खोल असल्याचे सांगण्यात येत आहे.

 

बचावकार्य युद्धपातळीवर: घटनेची माहिती मिळताच मुंबई अग्निशामक दल, स्थानिक पोलीस आणि महानगरपालिकेची बचाव पथके तातडीने घटनास्थळी दाखल झाली. मॅनहोलमध्ये कोसळलेल्या व्यक्तीचा शोध घेण्यासाठी अग्निशामक दलाकडून युद्धपातळीवर शोधमोहीम राबवली जात आहे. मात्र, घटनेला काही तास उलटूनही अद्याप सदर व्यक्तीचा काहीही थांगपत्ता लागलेला नाही, ज्यामुळे स्थानिकांमध्ये आणि नातेवाईकांमध्ये मोठी चिंता व्यक्त केली जात आहे.

पालिकेच्या सुरक्षा व्यवस्थेवर प्रश्नचिन्ह: मुंबईमध्ये उघड्या मॅनहोलची समस्या नवीन नाही. काही दिवसांपूर्वीच मुंबईतील गांधी मार्केट परिसरात महापौर रितू तावडे यांच्या उपस्थितीत पाहणी सुरू असताना, चक्क पालिकेचाच एक कर्मचारी मॅनहोलमध्ये पडल्याची घटना घडली होती. या घटना ताज्या असतानाच साकीनाका येथे पुन्हा अशाच प्रकारची दुर्घटना घडल्याने मुंबई महापालिकेच्या (BMC) सुरक्षाविषयक उपाययोजनांवर पुन्हा एकदा गंभीर प्रश्नचिन्ह उपस्थित होत आहे. पावसाळ्यापूर्वी नाल्यांची साफसफाई आणि मॅनहोल सुरक्षित करण्याच्या दाव्यांची यामुळे पोलखोल झाली आहे.