मुंबईत खळबळ! दादरमध्ये एमएसीटीच्या न्यायाधीशांच्या गाडीचा रस्ता अडवून शिवीगाळ आणि जीवे मारण्याची धमकी; दोघांवर गुन्हा दाखल

मुंबई: महाराष्ट्राची राजधानी मुंबईतून एक अत्यंत धक्कादायक आणि संतापजनक वृत्त समोर आले आहे. मुंबईतील दादर भागात मोटार अपघात दावा न्यायाधिकरणाचे (MACT) सदस्य तथा न्यायाधीश शशिकांत बांगर यांच्या कारचा रस्ता अडवून त्यांना आणि त्यांच्या पत्नीला शिवीगाळ करत जीवे मारण्याची धमकी देण्यात आल्याचा प्रकार उघडकीस आला आहे. याप्रकरणी माटुंगा पोलीस ठाण्यात दोन अज्ञात इसमांविरोधात भारतीय न्याय संहिितेच्या (BNS) विविध कलमांखाली एफआयआर (FIR) दाखल करण्यात आली असून, पोलीस आरोपींचा कसून शोध घेत आहेत.

मिळालेल्या सविस्तर माहितीनुसार, ही खळबळजनक घटना गेल्या महिन्यात १३ जुलै रोजी रात्री साडेदहा वाजण्याच्या सुमारास दादर टीटी परिसरातील इराणी मॅन्शनजवळ घडली होती. मोटर अपघात दावा न्यायाधिकरणाचे (MACT) न्यायाधीश शशिकांत बांगर हे आपली पत्नी विद्या आणि मुलगी साक्षी यांच्यासोबत धुळ्यातून मुंबईत परतले होते. त्यांनी आपली मुलगी साक्षी हिला दादर येथे सोडले आणि तेथून ते आपल्या कारने घरी परजत होते. न्यायाधीश बांगर यांच्या कारच्या डॅशबोर्डवर 'न्यायाधीश' (Judge) अशी लिहिलेली अधिकृत पाटी लावलेली होती.

दादर परिसरातील इराणी मॅन्शनजवळ आले असता, दोन अज्ञात तरुण मोटारसायकलवरून आले आणि त्यांनी अचानक न्यायाधीश बांगर यांच्या एसयूव्ही (SUV) कारचा रस्ता अडवला. आरोपींनी कोणतीही पूर्वकल्पना किंवा कारण नसताना न्यायाधीश यांच्या कारचे मोबाईलवरून व्हिडिओ रेकॉर्डिंग आणि फोटो काढण्यास सुरुवात केली. कारच्या डॅशबोर्डवर लावलेली 'न्यायाधीश' लिहिलेली पाटी पाहून ते दोघे संतापले आणि त्यांनी कारमध्ये कोण बसले आहे, अशी विचारणा करत अरेरावी करण्यास सुरुवात केली.

जेव्हा न्यायाधीश शशिकांत बांगर यांनी खाली उतरून त्यांना गाडीचे रेकॉर्डिंग करण्यामागचे कारण विचारले आणि आपण न्यायालयाचे न्यायाधीश असल्याचे सांगितले, तेव्हा आरोपींचे वर्तन अधिक आक्रमक झाले. आरोपींनी त्यांना शिवीगाळ करण्यास सुरुवात केली आणि "तुला मारून टाकीन," अशी उघड धमकी दिली. तसेच, न्यायाधीश बांगर यांनी या सर्व प्रकारादरम्यान स्वतःचा व कुटुंबाचा बचाव करण्यासाठी आणि पोलीस मदत मागण्यासाठी ११२ आणि १०० या आपत्कालीन क्रमांकावर संपर्क साधण्याचा प्रयत्न केला, मात्र आरोपींनी त्यांना पोलिसांशी संपर्क साधण्यापासून रोखण्याचा आणि अडथळा आणण्याचा प्रयत्न केला.

या संपूर्ण घटनेमुळे न्यायाधीशांचे कुटुंब प्रचंड दहशतीत आले होते. आरोपींच्या संशयास्पद हालचालींवरून आणि अरेरावीवरून ते व्यावसायिक ब्लॅकमेलर किंवा गुन्हेगारी पार्श्वभूमीचे असावेत, असा संशय पीडित न्यायाधीशांनी व्यक्त केला आहे. या गंभीर प्रकरqची दखल घेत माटुंगा पोलिसांनी अखेर संबंधित दोन अज्ञात आरोपींविरुद्ध गुन्हा नोंदवला असून, परिसरातील सीसीटीव्ही फुटेजच्या आधारे दोघांचा शोध घेण्यासाठी पोलिसांची पथके कसून तपास करत आहेत.