ठाण्यात संतापजनक प्रकार! आश्रमशाळेतील तब्बल २१ विद्यार्थिनींचा विनयभंग; तक्रार दडपल्याप्रकरणी अधीक्षिकेवरही कारवाईचा बडगा, ५९ वर्षीय नराधम अटकेत

ठाणे जिल्ह्यातील शहापूर तालुक्यातून एक अत्यंत संतापजनक, लाजिरवाणी आणि हादरवून टाकणारी घटना समोर आली आहे. शहापूर तालुक्यातील टेंभा गावाच्या हद्दीत असलेल्या शासकीय आदिवासी आश्रमशाळेत शिकणाऱ्या तब्बल २१ अल्पवयीन विद्यार्थिनींचा एका कर्मचाऱ्याकडून लैंगिक विनयभंग करण्यात आल्याचा धक्कादायक प्रकार उघडकीस आला आहे. या गंभीर प्रकरणात पोलिसांनी तातडीने कारवाई करत ५९ वर्षीय नराधम कर्मचाऱ्याला बेड्या ठोकल्या आहेत. विशेष म्हणजे, या संपूर्ण प्रकरणात विद्यार्थिनींच्या तक्रारीकडे दुर्लक्ष करून ती दडपण्याचा गंभीर प्रयत्न केल्याचा ठपका शाळेच्या अधीक्षिकेवरही ठेवण्यात आला आहे, ज्यामुळे शिक्षण क्षेत्रात आणि पालकांमध्ये तीव्र संताप उसळला आहे.

मिळालेल्या सविस्तर माहितीनुसार, टेंभे येथील या शासकीय आदिवासी आश्रमशाळेमध्ये दुर्गम भागातील सुमारे पावणेचारशे विद्यार्थी शिक्षण घेत असून शाळेच्या परिसरातच वसतिगृहाची सोय आहे. येथील एका अल्पवयीन विद्यार्थिनीने काही दिवसांपूर्वी संबंधित कर्मचाऱ्याच्या विरोधात अयोग्य वर्तणूक आणि विनयभंगाची तक्रार केली होती. मात्र, ही तक्रार वरिष्ठांपर्यंत पोहोचवून कारवाई करण्याऐवजी शाळेच्या अधीक्षिकेने ती दडपण्याचा प्रयत्न केला. हिंमत न हारता एका पीडित विद्यार्थिनीने याबाबत इतर मैत्रिणींना सांगताच एकापाठोपाठ एक अशा तब्बल २१ विद्यार्थिनींनी त्या नराधम कर्मचाऱ्याच्या विकृत कृत्याची पोलखोल केली. या धक्कादायक खुलाशाने शाळेत आणि प्रशासनात एकच खळबळ उडाली.

गणपत झिपरू गवळी (वय ५९, रा. टेंभा, ता. शहापूर) असे अटक करण्यात आलेल्या नराधम आरोपी कर्मचाऱ्याचे नाव आहे. यापूर्वीही दीड ते दोन वर्षांपूर्वी अघई येथील आश्रमशाळेत असताना गवळी याच्यावर अशाच प्रकारे एका विद्यार्थिनीच्या विनयभंगाचा गंभीर आरोप झाला होता, त्यावेळीही त्याला निलंबित करण्यात आले होते. असे असतानाही पुन्हा अशाच विकृत प्रवृत्तीच्या व्यक्तीला शाळेत कामावर कसे ठेवले, असा संतप्त सवाल पालकांकडून आणि स्थानिक नागरिकांकडून उपस्थित केला जात आहे. याप्रकरणी शहापूर पोलीस ठाण्यात पोक्सो (POCSO) कायद्यासह विविध गंभीर कलमांन्वये गुन्हा दाखल करण्यात आला असून, पोलीस या प्रकरणाचा अधिक सखोल तपास करत आहेत. तसेच विद्यार्थिनींच्या सुरक्षेचा प्रश्न पुन्हा एकदा ऐरणीवर आला असून संबंधितांवर कठोर कारवाई करण्याची मागणी जोर धरत आहे.