शिवराज्याभिषेक सोहळ्यापूर्वी मोठा निर्णय; रायगडचा पायरी मार्ग ३० आणि ३१ मे रोजी राहणार बंद!

महाड: स्वराज्याची राजधानी असणाऱ्या ऐतिहासिक दुर्गराज रायगड किल्ल्यावर दरवर्षीप्रमाणे यंदाही 'शिवराज्याभिषेक दिन सोहळा' अत्यंत उत्साहात साजरा केला जाणार आहे. तारखेनुसार ६ जून तर तिथीनुसार २६ जून रोजी होणाऱ्या या भव्य सोहळ्याच्या पार्श्वभूमीवर गडावर शिवभक्तांची आणि अतिमहत्त्वाच्या व्यक्तींची मोठी गर्दी होण्याची शक्यता आहे. या सोहळ्याच्या पूर्वतयारीचा आणि सुरक्षेचा भाग म्हणून रायगड जिल्हा आपत्ती व्यवस्थापन प्राधिकरणाने एक अत्यंत महत्त्वाचा निर्णय घेतला आहे. सुरक्षेच्या कारणास्तव गडावर जाणारा मुख्य पायरी मार्ग ३० आणि ३१ मे रोजी पूर्णपणे बंद ठेवण्याचे आदेश जारी करण्यात आले आहेत.

नेमके कारण काय? प्रशासनाने दिलेल्या माहितीनुसार, गेल्या काही वर्षांत गड-किल्ल्यांवर तटबंदी किंवा उंच कड्यांवरून दगड कोसळण्याच्या दुर्घटना घडल्या आहेत. याची गंभीर दखल घेत यावर्षी कोणतीही जीवितहानी किंवा दुर्घटना टाळण्यासाठी आधीच खबरदारी घेतली जात आहे. ३० आणि ३१ मे रोजी गडावरील धोकादायक आणि सैल झालेले दगड हटविण्याचे (Rock Scaling) काम मार्ग प्रकल्प विभाग, महाड आणि दुर्गवीर प्रतिष्ठान यांच्या माध्यमातून केले जाणार आहे. हे काम सुरू असताना पायी ये-जा करणाऱ्या पर्यटकांना किंवा शिवभक्तांना दगड लागून मोठा धोका निर्माण होऊ शकतो. त्यामुळे हे दोन दिवस पायरी मार्ग पूर्णपणे बंद असेल.

रोपवे सेवा नियमित सुरू राहणार पायरी मार्ग बंद असला तरी गडावर जाणाऱ्या पर्यटकांसाठी दिलासादायक बाब म्हणजे 'रायगड रोपवे' सेवा या दोन्ही दिवशी नियमित सुरू राहणार आहे. त्यामुळे ज्यांना गडावर जाणे आवश्यक आहे, ते रोपवेच्या माध्यमातून जाऊ शकतात.

जिल्हा प्रशासनाने मार्ग प्रकल्प विभाग आणि संबंधित संस्थांना सर्व सुरक्षा नियमांचे काटेकोरपणे पालन करून काम करण्याचे निर्देश दिले आहेत. तसेच कायदा व सुव्यवस्था राखण्यासाठी आणि गर्दीचे नियंत्रण करण्यासाठी गडावर व पायरी मार्गाच्या परिसरात अतिरिक्त पोलीस बंदोबस्त तैनात करण्याचे आदेशही देण्यात आले आहेत. तरी सर्व शिवभक्तांनी आणि पर्यटकांनी प्रशासनाला सहकार्य करावे आणि आपल्या प्रवासाचे नियोजन या बदलाचा विचार करून करावे, असे आवाहन जिल्हा प्रशासनातर्फे करण्यात आले आहे.