पुणे: एमबीबीएस प्रवेशाच्या नावाखाली ४० हून अधिक विद्यार्थ्यांची फसवणूक; हायटेक ठग अरविंद आरोगोंडाला पुणे पोलिसांकडून अटक.

पुणे: डॉक्टर बनण्याचे स्वप्न पाहणाऱ्या राज्यातील अनेक विद्यार्थी आणि त्यांच्या पालकांना कोट्यवधी रुपयांचा गंडा घालणाऱ्या एका मोठ्या रॅकेटचा पुणे पोलिसांनी पर्दाफाश केला आहे. एमबीबीएस (MBBS) प्रवेश मिळवून देण्याचे आमिष दाखवून फसवणूक करणाऱ्या तेलंगणातील एका हायटेक ठगाला येरवडा पोलिसांनी अटक केली आहे.

नेमके प्रकरण काय? अटक करण्यात आलेल्या मुख्य मास्टरमाइंडचे नाव अरविंद प्रकाशकुमार आरोगोंडा (वय ४७, रा. सिकंदराबाद, तेलंगणा) असे आहे. या आरोपीने पुणे आणि मुंबईसह संपूर्ण महाराष्ट्रभरात आपले जाळे पसरवले होते. त्याने एमबीबीएस प्रवेशाच्या नावाखाली ४० हून अधिक विद्यार्थ्यांची लाखो रुपयांची फसवणूक केल्याचे तपासात समोर आले आहे.

 

कारवाई कशी झाली?आरोपी अरविंद आरोगोंडा याच्याविरुद्ध यापूर्वीही फसवणुकीचे गुन्हे दाखल होते. या रॅकेटचा पर्दाफाश करण्यासाठी येरवडा पोलिसांनी अत्यंत नाट्यमयरीत्या कारवाई केली.

हा आरोपी याआधीच फसवणुकीच्या एका प्रकरणात मुंबईच्या आर्थर रोड कारागृहात न्यायालयीन कोठडीत होता, तिथूनच त्याला पुणे पोलिसांनी अटक केली आहे. या टोळीने महाराष्ट्र आणि तेलंगणा अशा दोन्ही राज्यांमध्ये आपले केंद्र सक्रिय ठेवले होते, असेही तपासात निष्पन्न झाले आहे.