Pune : महिलांसाठी पुणे महापालिकेचा संवेदनशील निर्णय; पिंक रूम, मोफत स्वच्छतागृहांसह विविध उपक्रमांची घोषणा

Pune : पुण्यात महिलांच्या सुरक्षितता, आर्थिक स्वावलंबन आणि सक्षमीकरणासाठी पुणे महानगरपालिकेने अनेक उपक्रम जाहीर केले आहेत. या उपक्रमांचा उद्देश आहे की महिलांना आत्मविश्वास येईल, स्वतःला सुरक्षित ठेवता येईल आणि आर्थिकदृष्ट्या स्वावलंबी बनता येईल. पुणे महापालिकेकडून सर्वप्रथम, स्वसंरक्षण प्रशिक्षण केंद्र सुरू केले जाणार आहे. येथे महिलांना ज्युडो, कराटे, लाठी-काठी, योग आणि व्यायाम शिकवले जाईल. त्यामुळे महिलांना स्वतःला कोणत्याही परिस्थितीत सुरक्षित ठेवण्याची क्षमता मिळेल.

महिला बचत गटांसाठी कौशल्य विकास आणि कायमस्वरूपी बाजारपेठ उपलब्ध करून दिली जाईल. यामध्ये महिलांना पैसे वाचवायला, व्यवसाय चालवायला आणि रोजगार मिळवायला मदत होईल. त्यामुळे महिलांचा आर्थिक स्वावलंबन वाढेल आणि त्यांना स्वतःच्या व्यवसायासाठी संधी मिळेल.

महिला सक्षमीकरणासाठी व्यवसाय प्रशिक्षण, दहावी-बारावीच्या विद्यार्थिनींसाठी खासगी क्लासेस, सीईटी परीक्षांसाठी आर्थिक सहाय्य, कुटुंब नियोजन शस्त्रक्रियेसाठी अनुदान, मुलगी दत्तक योजना, रमाई स्वावलंबन योजना, संजय गांधी निरा अनुदान योजना, इंदिरा गांधी विधवा निवृत्तीवेतन योजना असे अनेक उपक्रम राबवले जातील. याशिवाय बचत गटांना निधी, स्वसंरक्षण वर्ग आणि योगासन वर्गही उपलब्ध असतील.

महिलांच्या मालकी हक्काला चालना देण्यासाठी ३१ मार्च २०२६ पर्यंत ५०० चौ.फुटपर्यंतच्या संपत्तीस ५०% करमाफी देण्यात येणार आहे, जेणेकरून महिलांचा हक्क सुरक्षित राहील.महिला उद्योजक, बचत गट आणि सामाजिक संस्था यांच्यासाठी कन्व्हेन्शन सेंटर उभारले जाईल, जिथे प्रशिक्षण, परिषद, प्रदर्शन आणि संवाद कार्यक्रम आयोजित केले जातील.शाळांमध्ये किशोरवयीन मुलींसाठी पिंक रूम तयार केली जाईल, जिथे त्यांना शारीरिक, मानसिक आणि शैक्षणिक मार्गदर्शन मिळेल.
शहरातील सार्वजनिक ठिकाणी महिलांसाठी १०० मोफत स्वच्छतागृह उभारले जातील, जे स्वच्छ, सुरक्षित आणि सुसज्ज असतील.

तसेच, राणी लक्ष्मीबाई महिला सक्षमीकरण योजना अंतर्गत महिलांना कौटुंबिक सल्ला, कायदे मार्गदर्शन आणि मानसिक-सामाजिक मदत मिळेल.

या सर्व उपक्रमांमुळे पुण्यातील महिलांना सशक्त बनवता येईल, त्यांचा समाजात सहभाग वाढेल आणि त्यांचे जीवनमान सुधारेल असे सांगण्यात येत आहे. शहरातील वाढते महिलांवरील अत्याचार हे या योजणांमुळे कमी होणार का? शहरातील महिला पूर्णतः सक्षम बनणार का? याकडे आता पुणेकरांचे लक्ष लागले आहे