Pune : सुट्टीवर आलेल्या CRPF जवानाचा दुर्दैवी मृत्यू; वडिलांच्या डोळ्यांसमोरच काळाचा घाला, इंदापूर हादरलं…

Indapur : पुणे–सोलापूर महामार्गावर झालेल्या भीषण अपघातात मराडेवाडी (ता. इंदापूर) येथील सीआरपीएफ जवान महादेव दादा नाझीरकर (वय 34) यांचा जागीच मृत्यू झाला. या दुर्दैवी घटनेने संपूर्ण परिसरावर शोककळा पसरली आहे. इंदापूर तालुक्यातील पळसदेव येथे कुटुंबाचा आधारवड आणि देशसेवेची शपथ घेतलेला एक कर्तव्यदक्ष जवान काळाच्या पडद्याआड गेला आहे.

याबाबत मिळालेल्या माहितीनुसार, सुट्टीसाठी गावी आलेले महादेव नाझीरकर रविवारी रात्री लोणी देवकर येथील तोडेकस्ती जवळ आपल्या वडिलांना घ्यायला गेले होते. रस्ता ओलांडत असताना भरधाव अज्ञात वाहनाने त्यांना जोरदार धडक दिली. धडक इतकी भीषण होती की, महादेव नाझीरकर यांचा जागीच मृत्यू झाला. अपघाताच्या वेळी त्यांचे वडील रस्त्याच्या दुसऱ्या बाजूला उभे होते. डोळ्यांसमोर घडलेला हा प्रसंग त्यांच्या आयुष्यातील न पुसता येणारा आघात ठरला.

महादेव नाझीरकर हे केंद्रीय राखीव पोलिस दलात कार्यरत होते आणि सध्या मुंबई येथे सेवेत होते. देशाच्या सुरक्षेसाठी अहोरात्र कर्तव्य बजावणारा हा जवान स्वतःच्या गावातच नियतीच्या घातक वाराला बळी पडला. सोमवारी (ता. 09) दुपारी शासकीय इतमामात त्यांच्या पार्थिवावर अंत्यसंस्कार करण्यात आले. गावातील नागरिक, नातेवाईक आणि सहकाऱ्यांनी अश्रूंच्या धारा वाहत त्यांना अखेरचा निरोप दिला.

त्यांच्या पश्चात वृद्ध आई-वडील, पत्नी आणि लहान मुले असा परिवार आहे. कुटुंबाचा आधारवड हरपल्याने घरावर दुःखाचा डोंगर कोसळला आहे. देशासाठी झटणाऱ्या या जवानाच्या जाण्याने केवळ कुटुंबच नव्हे, तर संपूर्ण गावाने एक कर्तव्यदक्ष सुपुत्र गमावला आहे. दरम्यान, अपघातानंतर पसार झालेल्या अज्ञात वाहनाचा शोध पोलीस घेत आहेत.