Pune : पुण्यात पुन्हा राजकीय हालचालींना वेग! मध्यरात्री दोन्ही राष्ट्रवादींची गुप्त बैठक, काका–पुतण्या एकत्र येणार की नवा ट्विस्ट? तासाभरात काय ठरलं?

Pimpri-Chinchwad : पिंपरी-चिंचवड महानगरपालिकेच्या आगामी निवडणुकीच्या पार्श्वभूमीवर शरद पवार आणि अजित पवार यांच्या राष्ट्रवादी काँग्रेसच्या पदाधिकाऱ्यांची गुप्त बैठक पार पडल्याची महत्त्वाची माहिती समोर आली आहे. या बैठकीत दोन्ही राष्ट्रवादी एकत्र येण्यावर प्राथमिक स्तरावर एकमत झाल्याची चर्चा रंगली आहे.

राष्ट्रवादी काँग्रेसचे माजी शहराध्यक्ष अजित गव्हाणे यांनी या बैठकीची माहिती देताना सांगितलं की, 'अजित पवार यांच्या सूचनेनंतरच ही बैठक आयोजित करण्यात आली होती. बैठकीत प्रामुख्याने जागा वाटपाचा तिढा सोडवण्यावर चर्चा झाली असून तो लवकरच मार्गी लागेल', असा विश्वास त्यांनी व्यक्त केला. या बैठकीला शरद पवार गटाकडून खासदार अमोल कोल्हे , आमदार रोहित पवार आणि शहराध्यक्ष तुषार कामठे उपस्थित होते. तर अजित पवार गटाकडून अजित गव्हाणे हे सहभागी झाले होते. बैठकीदरम्यान दोन्ही पक्षांचे उमेदवार जिंकू शकतील, अशाच जागांवर उमेदवारी देण्याबाबत सकारात्मक चर्चा झाल्याचं सांगण्यात येत आहे.

Purandar Airport : नवी मुंबईनंतर महाराष्ट्राला आणखी एक विमानतळ; येत्या वर्षात कामाला सुरुवात, मुख्यमंत्र्यांनी नेमकं काय सांगितलं?

अजित गव्हाणे यांनी स्पष्ट केलं की, 'अद्याप कोणताही अंतिम फॉर्म्युला ठरलेला नसून, महाविकास आघाडीतील घटक पक्षांनाही सोबत घेण्याचा प्रयत्न राहील. अंतिम निर्णय वरिष्ठ पातळीवरच घेतला जाईल', असंही त्यांनी यावेळी नमूद केलं. दरम्यान, खासदार अमोल कोल्हे यांनी या बैठकीबाबत फारसे भाष्य करण्याचं टाळलं. 'ही फक्त मैत्रीपूर्ण बैठक होती,' असं सांगत त्यांनी राजकीय चर्चेवर मौन बाळगलं. मात्र, 'राजकारणात काहीही होऊ शकतं,' असा सूचक इशाराही त्यांनी दिला.

शहरात पुन्हा एकदा सत्ता स्थापन करण्याच्या उद्देशाने या हालचाली सुरू असल्याचं स्पष्ट होत असून, शिवसेना आणि मनसे तसेच इतर काही पक्षही अजित पवार यांच्या राष्ट्रवादीच्या संपर्कात असल्याची माहिती अजित गव्हाणे यांनी दिली आहे. खासदार अमोल कोल्हे आणि आमदार रोहित पवार हे अजित पवारांची भेट घ्यायला गेले आहेत. दोन्ही राष्ट्रवादीविषयी त्यांच्यात चर्चा होणार आहे. या घडामोडींमुळे पिंपरी-चिंचवड शहरात दोन्ही राष्ट्रवादी काँग्रेस एकत्र येण्याची शक्यता जवळपास निश्चित मानली जात आहे.