Pune : अंधारात महिलांना एकटं गाठणारा ‘रोड रोमिओ’ अखेर जाळ्यात; 245 CCTV फुटेज तपासून पुणे पोलिसांची कारवाई

Pune : रात्रीच्या वेळी सुनसान रस्त्यावर एकट्या महिलांना हेरून त्यांची छेड काढायचा. गेल्या वर्षभरापासून पोलिसांना गुंगारा देणाऱ्या सराईत गुन्हेगाराला अटक करण्यात विमानतळ पोलिसांना यश आले आहे. तब्बल २४५ सीसीटीव्ही कॅमेऱ्यांचे फुटेज तपासून पोलिसांनी या विकृत आरोपीच्या मुसक्या आवळल्या आहेत. सागर राम सोनवणे (वय २२, रा. भोसरी) असे अटक करण्यात आलेल्या आरोपीचे नाव आहे.

विमानतळ पोलीस ठाण्याच्या हद्दीतील लोहगाव, गणेश पार्क परिसरात नुकतीच एक धक्कादायक घटना घडली होती. एका दुचाकीस्वार अज्ञात तरुणाने एका अल्पवयीन मुलीचा पाठलाग करून तिचा विनयभंग केला होता.याप्रकरणी भारतीय न्याय संहिता (BNS) कलम ७४, ७५ आणि बाललैंगिक अत्याचार प्रतिबंधक कायदा (POCSO) कलम ८ व १२ अन्वये गुन्हा (क्र. ६२४/२०२५) दाखल करण्यात आला होता. या भागात अशा घटना वारंवार घडत असल्याने महिलांमध्ये भीतीचे वातावरण पसरले होते.

Pune : कोर्टात फरार म्हणून घोषित! निलेश घेगावळवर आता सर्वात कठोर कारवाईची शक्यता वाढली

वरिष्ठ पोलीस निरीक्षक गोविंद जाधव यांनी या प्रकरणाचे गांभीर्य ओळखून आरोपीला तात्काळ पकडण्याचे आदेश दिले. आरोपीचा कोणताही थांगपत्ता नसताना तपास पथकाने विमाननगर, विश्रांतवाडी, दिघी आणि भोसरी या परिसरातील तब्बल २४५ सीसीटीव्ही कॅमेरे तपासले. तांत्रिक विश्लेषणाच्या आधारे पोलिसांना आरोपीचा सुगावा लागला आणि सापळा रचून त्याला शिताफीने अटक करण्यात आली.

आरोपीला पोलिसांनी अटक केल्यानंतर या प्रकरणाची व्याप्ती किती मोठी आहे हे समोर आलं. हा विकृत गुन्हेगार कशा पद्धतीने महिला हेरायचा आणि त्याची गुन्ह्याची पद्धत कशी होती हे ऐकून पोलीस देखील चक्रावून गेले. पोलीस तपासात आरोपी सागर सोनवणे याची गुन्हे करण्याची पद्धत समोर आली आहे. तो रात्रीच्या वेळी दुचाकीवरून फिरत असे. सुनसान रस्ते किंवा अंधार असलेल्या ठिकाणी एकटी महिला किंवा मुलगी दिसली की तो त्यांचा विनयभंग करून वेगाने पळून जात असे. पोलिसांच्या हाती लागू नये म्हणून तो सीसीटीव्ही नसलेले रस्ते किंवा आडवाटांची निवड करायचा. मात्र, पोलिसांनी केलेल्या कसून चौकशीत सागरने विमानतळ पोलीस ठाण्याच्या हद्दीत आतापर्यंत ५ वेळा विनयभंग केल्याची कबुली दिली आहे. याव्यतिरिक्त इतर पोलीस ठाण्यांच्या हद्दीतही त्याने असे गुन्हे केल्याचे निष्पन्न झाले आहे.

ही कारवाई पोलीस आयुक्त अमितेश कुमार, सहआयुक्त रंजनकुमार शर्मा, अपर पोलीस आयुक्त मनोज पाटील, उपायुक्त सोमय मुंडे आणि एसीपी प्रांजली सोनवणे यांच्या मार्गदर्शनाखाली करण्यात आली. वरिष्ठ पोलीस निरीक्षक गोविंद जाधव आणि पोलीस निरीक्षक (गुन्हे) शरद शेळके यांच्या नेतृत्वाखालील तपास पथकाने ही कामगिरी फत्ते केली.