Pune News: सव्वा महिन्यात वाढले लाखभर मतदार; चिंचवड, हडपसर ठरले जिल्ह्यातील सर्वाधिक मोठे मतदारसंघ

Pune  : लोकसभा निवडणुकीत मतदारयाद्यांमधून नावे गायब झाल्याचा सर्वाधिक फटका ‘महायुती’ला बसल्याच्या विश्लेषणानंतर राज्य सरकारकडून जिल्हा प्रशासनाची चांगलीच कानउघाडणी करण्यात आली होती. उच्चपदस्थ प्रशासकीय अधिकाऱ्यांची झाडाझडती झाल्यानंतर जिल्हा प्रशासन कामाला लागले असून, अवघ्या सव्वा महिन्यात पुण्यात एक लाख मतदारांची भर पडली आहे. यामध्ये २८ आणि २६ हजार मतदार अनुक्रमे पुणे आणि बारामती लोकसभा मतदारसंघात वाढले आहेत.

अधिकाऱ्यांची खरडपट्टी

महायुतीच्या नेत्यांनी लोकसभा निवडणुकीतील पराभवाचे विश्लेषण केल्यानंतर त्यांना तीन टक्के मतांचा फटका बसल्याचे स्पष्ट झाले. प्रत्येक बुथवर किमान २५ मते जरी वाढली असती, तरी त्यांना इतका मोठा फटका बसला नसता, अशी कारणमीमांसा या नेत्यांनी केली आहे. हा फटका बसण्यात मतदारयाद्यांमधून मोठ्या प्रमाणात मतदारांची नावे कमी झाल्याचाही दाखला देण्यात आला. या पार्श्वभूमीवर उपमुख्यमंत्री देवेंद्र फडणवीस यांनी पुण्यातील उच्चपदस्थ अधिकाऱ्यांची गेल्या महिन्यांत आमदारांसमोर चांगलीच खरडपट्टी काढली होती. या वेळी फडणवीस यांनी मतदारयाद्या तुमच्या कार्यालयासमोर आणून जाळायच्या का, असाही संताप व्यक्त केल्याचे सूत्रांनी सांगितले. या खरडपट्टीनंतर जिल्हा प्रशासन कामाला लागले आणि त्यांनी अवघ्या सव्वा महिन्यात एक लाख मतदारांची नव्याने नोंदणी केली आहे.

Maharashtra : शिवसागर जलाशयात शिवप्रताप तराफा दाखल; कोयनेतील दळणवळण होणार सोयीचे; संभाजी शिंदेंच्या हस्ते पूजन

 

नावे गायब झाल्याची तक्रार

लोकसभा निवडणुकीत खडकवासला आणि कोथरूड मतदारसंघात मतदारांची नावे गायब झाल्याची सर्वाधिक ओरड झाली होती. त्यामुळे मतदान केंद्राचे सुसूत्रीकरण करण्याचे पाऊल जिल्हा प्रशासनाने उचलले; तसेच २५ जूनपासून पुन्हा नव्याने मतदार नोंदणी सुरू करण्यात आली होती. परिणामी, अवघ्या सव्वा महिन्यात पुणे जिल्ह्यात लाखभर मतदारांची भर पडली. त्यामुळे एप्रिलमधील ८३ लाख ३८ हजार असलेली मतदारसंख्या ८४ लाख ३९ हजारांपर्यंत पोहोचली. त्यात शहरी भागात चिंचवड हा सर्वाधिक मोठा मतदारसंघ ठरला. त्या पाठोपाठ हडपसर, भोसरी, खडकवासला या शहरी मतदारसंख्येत चांगली वाढ झाली आहे. जिल्हा प्रशासनाकडून नुकतीच प्रारूप मतदारयादी प्रसिद्ध करण्यात आली आहे.

लोकसभेला पुणे शहरासह जिल्ह्यात ८३ लाख ३८ हजार ७४७ इतके मतदार होते. २५ जून ते १० ऑगस्टपर्यंतच्या सव्वा महिन्यात झालेल्या नावनोंदणीमुळे एक लाख ९८२ इतक्या मतदारांची वाढ झाली आहे. यामध्ये ५० हजार ६१६ इतके पुरुष, तर ५० हजार ३५२ महिला मतदारांचा समावेश आहे. १४ तृतीयपंथाचा ही समावेश आहे, अशी माहिती जिल्हा प्रशासनाने दिली.
चिंचवड, हडपसर सर्वाधिक मोठे

चिंचवड मतदारसंघात ९१९२ मतदारांची भर पडल्याने हा मतदारसंघ जिल्ह्यात सर्वाधिक मोठा ठरला आहे. त्या पाठोपाठ हडपसरमध्ये ८७०७ इतके, तर भोसरी मतदारसंघात सात हजार ३७७ इतके मतदार वाढल्याने अनुक्रमे दुसरा आणि तिसऱ्या क्रमाकांचे मोठे मतदारसंघ ठरले आहेत. त्या पाठोपाठ खडकवासला विधानसभा मतदारसंघामध्ये ७८६२ इतक्या मतदारांची वाढ झाली आहे. कसबा, शिवाजीनगर, पर्वती; तसेच पिंपरीसारख्या शहरातील मतदारसंघामध्ये कमी मतदारांची भर पडली आहे. तर जिल्ह्यात शिरूर, पुरंदर आणि भोर मतदारसंघामध्ये मतदारसंख्या ही चार लाखांपेक्षा जास्त आहे.
पुणे शहर जिल्ह्यातील मतदारसंख्यांची स्थिती
मतदारसंघ ....... एकूण वाढलेले मतदार.... एकूण आतापर्यंतची मतदारसंख्या

पुणे लोकसभा
वडगाव शेरी ....................८८६९..............४,७६,५३८
कोथरूड ................६,३२४...................४,२१,०७९
पर्वती ................३६८४...................... ३,४४,७३९
शिवाजीनगर ......... ३३०१................. २,८१,८३१
पुणे कँटोन्मेंट ...........४२४८................ २,८६,५१८
कसबा ...............१६०९....................२,७८,६०६

बारामती लोकसभा
खडकवासला .............७,८६२...................... ५,४५,८९३
दौंड ..............२४३५ .......................३,०७,०४२
इंदापूर ....................१९९९ ..................३,२५,५४०
बारामती .............२३६०..............३,७१,५७७
पुरंदर ..............७०६३ ................४,३६,४१४
भोर ................४४९३...................४,१२,४१४

शिरूर लोकसभा
हडपसर ............ ८७०७.............५,९०,६११
भोसरी ...............७,३७७....................५,५८,९५९
जुन्नर .............२६३४......................३,१४,८३९
आंबेगाव ................२१६५ .................३,०४,२६६
खेड आळंदी..............४४७१......................३,५७,१०५
शिरूर ............६०२४ ..................४,४५,३००

मावळ लोकसभा
चिंचवड ..................९१९२ ...............६,२७,४३७
पिंपरी ..............३८०३.........................३,७७,२५१
मावळ....................२३६२ ....................३,७५,७७०
एकूण ................१,००,९८२...............८४,३९,७२९


पुणे शहर जिल्ह्यात २५ जूनपासून झालेल्या मतदार नोंदणी एक लाखांहून अधिक मतदारांची भर पडली आहे. त्यामुळे मतदारांना येत्या २० ऑगस्टपर्यंत नाव नोंदविण्याची मुदत आहे; तसेच कृष्णधवल कार्ड असणाऱ्यांनी यादीत नाव समाविष्ट करून घेण्यासाठी अर्ज करावे.