Mumbai : जेएनपीए पुलाजवळील रस्ता खचला; 68 कोटींच्या जोडरस्त्याची 8-10 महिन्यांतच दुर्दशा

Mumbai : उरण तालुक्यातील जेएनपीएच्या चौथ्या बंदराला जोडणाऱ्या उड्डाणपुलाजवळील जोडरस्त्याचा काही भाग अचानक खचल्याची धक्कादायक घटना समोर आली आहे. सुमारे 68 कोटी रुपये खर्चून उभारलेल्या या प्रकल्पाच्या गुणवत्तेबाबत गंभीर प्रश्न उपस्थित झाले आहेत.

करळ परिसरात राष्ट्रीय महामार्ग ४बी आणि राज्य मार्ग ५४ यांना जोडणारा हा महत्त्वाचा मार्ग असल्याने या घटनेमुळे मोठी खळबळ उडाली आहे.

8-10 महिन्यांतच रस्ता खचला

जसखार गावाला वळसा घालत चौथ्या बंदराशी थेट जोडण्यासाठी हा उड्डाणपूल उभारण्यात आला होता. भारत मुंबई कंटेनर टर्मिनल या खाजगी बंदरासाठी हा मार्ग अत्यंत महत्त्वाचा आहे.

मात्र, पूल सुरू होऊन अवघ्या 8 ते 10 महिन्यांतच जोडरस्ता खचल्याने “पूल सुरक्षित, पण रस्ता धोक्यात” अशी स्थिती निर्माण झाली आहे. यामुळे कामाच्या दर्जावर आणि संबंधित यंत्रणांच्या निष्काळजीपणावर प्रश्नचिन्ह उपस्थित होत आहे.

वाहतूक बंद, दुरुस्ती सुरू

घटनेनंतर प्रशासनाने तात्काळ उपाययोजना करत संबंधित मार्गावरील वाहतूक बंद केली आहे. सध्या दुरुस्तीचे काम युद्धपातळीवर सुरू असून संभाव्य अपघात टाळण्यासाठी खबरदारी घेतली जात आहे.

दरम्यान, या प्रकल्पाच्या बांधकामादरम्यान जसखार गावातील श्री रत्नेश्वरी देवी मंदिराला तडे गेल्याचा आरोप स्थानिकांनी यापूर्वीच केला होता. त्यामुळे आधीपासून वादात असलेल्या या प्रकल्पावर पुन्हा टीका होत आहे.

जत्रोत्सवाच्या पार्श्वभूमीवर चिंता वाढली

काही दिवसांवरच रत्नेश्वरी देवीचा जत्रोत्सव असल्याने मोठ्या प्रमाणात भाविकांची गर्दी अपेक्षित आहे. अशा वेळी रस्ता खचल्याची घटना अधिकच गंभीर मानली जात आहे.

मनसेचे पदाधिकारी मंगेश वाजेकर यांनी या प्रकाराबद्दल तीव्र नाराजी व्यक्त करत सखोल चौकशी आणि दोषींवर कठोर कारवाईची मागणी केली आहे.

चौकशीची मागणी जोरात

या घटनेमुळे प्रशासनाची झोप उडाली असून स्थानिक नागरिकांकडूनही उच्चस्तरीय चौकशीची मागणी होत आहे. भविष्यात अशा घटना टाळण्यासाठी दर्जेदार काम आणि कडक देखरेख आवश्यक असल्याचे मत व्यक्त होत आहे.