नागपुरात थरार! अवैध उत्खनन रोखण्यासाठी गेलेल्या नायब तहसीलदाराला जेसीबीला लटकवून ४ किमी फरफटत नेले!

नागपूर जिल्ह्यातील कुही तालुक्यातील बोरी नाईक परिसरात ५ मे २०२६ रोजी मध्यरात्री अवैध मुरूम उत्खननाविरोधात कारवाई करण्यासाठी गेलेल्या महसूल पथकावर माफियांनी जीवघेणा हल्ला केला.

या थरारक घटनेत नायब तहसीलदार बुद्धभूषण निकाळजे यांनी आपल्या प्राणाची पर्वा न करता एका पळून जाणाऱ्या जेसीबीला पकडले, त्यानंतर चालकाने त्यांना त्याच अवस्थेत सुमारे ३ ते ४ किलोमीटरपर्यंत फरफटत नेले. कारवाई सुरू होताच एका ट्रॅक्टर चालकाने थेट नायब तहसीलदारांच्या अंगावर वाहन घालून त्यांना चिरडण्याचा प्रयत्न केला. त्याच वेळी जेसीबी चालक मयूर थोटे याने वाहन वेगाने पळवायला सुरुवात केली.

निकाळजे यांनी धावत्या जेसीबीला पकडून ठेवले, मात्र चालकाने त्यांना खाली पाडण्यासाठी रस्त्याच्या कडेला असलेल्या काटेरी झाडांमधून वाहन नेले, ज्यामुळे त्यांच्या हाताला दुखापत झाली. समोरून पोलिसांचे वाहन येताना दिसताच चालकाने अखेर जेसीबी थांबवला. पोलिसांनी याप्रकरणी मुख्य आरोपी मयूर थोटेला अटक केली असून एक जेसीबी आणि दोन ट्रॅक्टर जप्त केले आहेत.