पुण्यात प्रेमाचा रक्तरंजित शेवट! राहत्या घरात घुसून प्रियकराचा प्रेयसीवर ब्लेडने जीवघेणा हल्ला; तरुणीची प्रकृती चिंताजनक!

पुण्यातील चंदननगर परिसरातून एक हृदयद्रावक आणि धक्कादायक घटना समोर आली आहे. प्रेमप्रकरणातील वादातून एका माथेफिरू प्रियकराने आपल्याच प्रेयसीवर ब्लेडने वार करून तिची निर्घृण हत्या करण्याचा प्रयत्न केला.
या घटनेमुळे परिसरात मोठी खळबळ उडाली असून महिलांच्या सुरक्षेचा प्रश्न पुन्हा एकदा ऐरणीवर आला आहे.

दिलीप राठोड असे आरोपीचे नाव असून त्याने पीडित तरुणीच्या घरात घुसून हा हल्ला केला. मिळालेल्या माहितीनुसार, दोघांमध्ये गेल्या काही दिवसांपासून प्रेमसंबंधावरून वाद सुरू होते. याच वादाचा राग मनात धरून दिलीप याने पीडितेचे राहते घर गाठले आणि तिच्या गळ्यावर तसेच हातावर ब्लेडने सपासप वार केले. तरुणीच्या ओरडण्याचा आवाज ऐकून शेजारी धावून आले, तोपर्यंत आरोपी तिथून पसार झाला होता. रक्ताच्या थारोळ्यात पडलेल्या तरुणीला तातडीने जवळच्या रुग्णालयात दाखल करण्यात आले असून तिची प्रकृती सध्या अत्यंत गंभीर आहे. पुणे पोलिसांनी याप्रकरणी खुनाचा प्रयत्न केल्याचा गुन्हा दाखल केला असून फरार आरोपीचा शोध घेण्यासाठी पथके रवाना केली आहेत.