मुंबई: पुण्याचा संपर्क तुटला; एक्स्प्रेस-वे आणि रेल्वे सेवा पूर्णपणे बंद!

मुंबई: मुंबई-पुण्याचा संपर्क पूर्णपणे तुटला सोमवारी सकाळपासून मुंबई आणि पुण्यात सुरू असलेल्या मुसळधार पावसामुळे जनजीवन विस्कळीत झाले असून मुंबई-पुण्यातील दळणवळण व्यवस्था पूर्णपणे ठप्प झाली आहे. अतिवृष्टी, सोसाट्याचा वारा आणि दरडी कोसळण्याच्या धोक्यामुळे प्रशासनाने सर्वत्र सतर्कतेचा इशारा दिला आहे.

एक्स्प्रेस-वे बंद: मुंबई-पुणे एक्स्प्रेस हायवेवरील फूड मॉल परिसरात रस्त्यावर मोठ्या प्रमाणात पाणी साचले आहे. सुरक्षिततेच्या कारणास्तव प्रशासनाने दोन्ही बाजूंची वाहतूक तात्पुरती बंद केली आहे. परिणामी, दोन्ही बाजूंनी वाहनांच्या किलोमीटरपर्यंत रांगा लागल्या आहेत. पाणी ओसरल्यानंतरच रस्ते वाहतुकीबाबत निर्णय घेतला जाईल.

रेल्वे वाहतूक ठप्प: रेल्वे ट्रॅकवर दरड कोसळल्याच्या घटनांमुळे मुंबई-पुणे रेल्वे सेवा बंद करण्यात आली आहे. दोन्ही दिशांच्या सर्व गाड्या रद्द करण्यात आल्या असून 'कनेक्टिंग लिंक' पूर्णपणे बंद झाली आहे.

 

जुना महामार्ग बंद: द्रुतगती मार्गासह जुना मुंबई-पुणे महामार्ग देखील पुढील आदेशापर्यंत पूर्णपणे बंद करण्यात आला आहे. नागरिकांनी अत्यावश्यक कामाशिवाय प्रवास टाळावा, असे आवाहन प्रशासनाकडून करण्यात आले आहे.

घाटमाथ्यावर अतिवृष्टी: पुणे जिल्ह्यातील भोर, राजगड, मुळशी, ताम्हिणी आणि वरंधा घाटात मुसळधार पाऊस सुरू आहे. ताम्हिणी घाटात रस्ता खचल्यामुळे वाहतुकीवर मोठा परिणाम झाला आहे.

प्रशासनाने प्रवाशांना आपत्कालीन सूचनांचे पालन करण्याचे आणि सध्या प्रवास टाळण्याचे आवाहन केले आहे.