Mumbai : बीकेसी ते शिळफाटा 20 किमी भुयारी मार्ग; डोंगर-खाडीखालून धावणार ‘बुलेट ट्रेन’, लवकरच खोदकाम सुरू

Mumbai : मुंबई-अहमदाबाद बुलेट ट्रेनचं काम आता वेगाने सुरू होणार आहे. मुंबईतील भूमिगत भागांसाठी खोदकाम लवकरच सुरू होणार असल्यामुळे निश्चित वेळेत बुलेट ट्रेन मुंबईमध्ये सुरू होईल अशी अपेक्षा आहे. सोमवारी या भागाच्या खोदकामासाठी लागणारे दोन टनेल बोरिंग मशीन जवाहरलाल नेहरू बंदरात दाखल होणार आहे. अनेक कारणांमुळे चीनमध्ये मालवाहतुकीत अडथळा निर्माण झाला होता. त्यामुळे अनेक महिन्यांपासून हे रखडले होते.

पहिला भाग 2025मध्येच दाखल
पहिल्या टनल बोरिंग मशीनचा काही भाग सप्टेंबर 2025मध्येच मुंबईत पोहचला होता. पण त्यानंतर मालवाहतूक प्रक्रियेतील अडचणींमुळे पुढील काम रखडले आणि मुंबईत खोदकाम सुरू करण्यात विलंब झाला. पण आता या फेरीत पहिल्या मशीनच्या उर्वरित भागांसह दुसऱ्या मशीनसाठी लागणाऱ्या सर्व गोष्टी मुंबईत येणार आहेत. अधिकाऱ्यांनी दिलेल्या माहितीनुसार, हा माल मार्चच्या सुरुवातीला चीनमधून निघाला आणि चेन्नई बंदरात पोहचला. चेन्नईहून माल 18 मार्च रोजी मुंबईसाठी रवाना झाला असून सोमवारी, 23 मार्च रोजी दाखल होईल.

हे मशीन दाखल होताच त्यांची जोडणी आणि चाचणी करून सुमारे तीन महिन्यांमध्ये खोदकाम सुरू होईल अशी अपेक्षा आहे. वांद्रे-कुर्ला संकुल ते शिळफाटादरम्यान 20.37 किमी मार्ग भूमिगत असणार आहे. या भागाच्या खोदकामासाठी या मशीचा वापर करण्यात येणार आहे. शिवाय या मार्गावरील 7 किमी बोगदा ठाण्याच्या खाडीखालून जाणार आहे. हे खोदकाम सर्वात आव्हानात्मक ठरणार आहे.

कसा असेल मार्ग?
मुंबई-अहमदाबाद बुलेट ट्रेन देशातील पहिली बुलेट ट्रेन असणार असून ताशी 320 किमी वेग असेल. मुंबईतील भुयारी बोगदे जमीनीखाली 25 ते 65 मीटर खोल असतील. शिळफाटा जवळ पार्सिक डोंगरांखाली हा बोगदा 114 मीटर खाली असेल. दरम्यान, वेळेत काम पूर्ण करण्यासाठी गरज पडल्यास तिसरी मशीनही आणण्याची योजना आहे. बीकेसी ते शिळफाटादरम्यान एकाच बोगद्यात अप आणि डाऊन हे रेल्वे मार्ग असतील.

मुंबई-अहमदाबात बुलेट ट्रेनचा मार्ग एकूण 508 किमी लांब असेल. यापैकी 97 किमी सूरत ते वापीदरम्यान मार्ग ऑगस्ट 2027मध्ये सुरू होणार आहे. यानंतर देशात आणखी 7 बुलेट ट्रेन प्रकल्प तयार करण्याची योजना आहे. यापैकी एक बुलेट ट्रेन मुंबई ते पुण्यादरम्यान बनणार आहे.