नांदेड: पतीचा जीव वाचवण्यासाठी मानवी ढाल बनणाऱ्या शूर पोलिसासमोर खासदार हरसिमरत कौर बादल नतमस्तक; हल्ल्यात पोलिसाच्या धाडसाचे सर्वत्र कौतुक

नांदेड: पंजाबचे माजी उपमुख्यमंत्री आणि शिरोमणी अकाली दल (SAD) चे अध्यक्ष सुखबीर सिंग बादल यांच्यावर नांदेडमधील गुरुद्वारा येथे झालेल्या प्राणघातक हल्ल्याप्रकरणी एक अत्यंत महत्त्वाची आणि गौरवास्पद बातमी समोर आली आहे. नांदेड दौऱ्यावर असताना गुरुद्वारातून बाहेर पडत असताना सुखबीर सिंग बादल यांच्यावर एका हल्लेखोराने धारदार शस्त्राने (कृपान) अचानक हल्ला केला होता. या भीषण हल्ल्यादरम्यान महाराष्ट्र पोलीस दलाच्या विशेष संरक्षण पथकातील (SPU) पोलीस निरीक्षक संतोष वैजनाथ केंद्रे यांनी अत्यंत अभूतपूर्व आणि अंगावर काटा आणणारे धाडस दाखवत स्वतःच्या जीवाची पर्वा न करता सुखबीर सिंग बादल यांच्या संरक्षणासाठी थेट 'मानवी ढाल' बनून हा हल्ला परतवून लावला.

या हल्ल्यामध्ये सुखबीर सिंग बादल यांच्या उजव्या हाताला गंभीर दुखापत झाली असून त्यांना तातडीने नांदेडमधील यशोसाई रुग्णालयात उपचारासाठी दाखल करण्यात आले होते. परंतु, पोलीस निरीक्षक संतोष केंद्रे यांनी दाखवलेल्या प्रसंगावधानामुळे आणि असीम धाडसामुळे एक मोठा अनर्थ टळला आणि बादल यांचा जीव वाचला. या झटापटीत पोलीस निरीक्षक संतोष केंद्रे हे देखील गंभीर जखमी झाले असून त्यांच्या हातालाही दुखापत झाली आहे.

 

 

या घटनेनंतर सुखबीर सिंग बादल यांच्या पत्नी आणि बठिंडाच्या खासदार हरसिमरत कौर बादल यांनी नांदेडमधील रुग्णालयात जाऊन पोलीस निरीक्षक संतोष केंद्रे यांची प्रत्यक्ष भेट घेतली आणि त्यांच्या प्रकृतीची आस्थेने विचारपूस केली. यावेळी त्यांनी संतोष केंद्रे यांच्या शौर्यासमोर आणि कर्तबगारीसमोर आदरपूर्वक नतमस्तक होत कृतज्ञता व्यक्त केली.

सोशल मीडियावर भावना व्यक्त करताना खासदार हरसिमरत कौर बादल यांनी लिहिले की, "महाराष्ट्र पोलिसांच्या विशेष संरक्षण पथकाचे पोलीस निरीक्षक संतोष वैजनाथ केंद्रे यांनी नांदेडमधील हल्ल्यादरम्यान सुखबीर सिंग बादलजींचा जीव वाचवण्यासाठी जे शौर्य आणि धाडस दाखवले, त्याला मी सलाम करते. संतोष, तू सुखबीरजी आणि हल्लेखोराच्या मध्ये एका मानवी ढालप्रमाणे उभा राहिलास आणि त्यांच्या संरक्षणासाठी स्वतःचा जीव धोक्यात घातला. याद्वारे तू आम्हाला पुन्हा एकदा दाखवून दिले की, खाकी गणवेश घालणे म्हणजे नेमके काय असते - स्वतःच्या आधी कर्तव्य आणि भीतीपेक्षा धैर्याला प्राधान्य देणे. बादल कुटुंब कृतज्ञतापूर्वक तुझ्यासमोर नतमस्तक होत आहे. तुझे हे धाडस कधीही विसरले जाणार नाही."

दरम्यान, या संपूर्ण घटनेची गंभीर दखल घेत मुख्यमंत्री देवेंद्र फडणवीस यांनी या हल्ल्याची सखोल चौकशी करण्याचे आदेश दिले आहेत. तसेच पंतप्रधान नरेंद्र मोदी आणि केंद्रीय गृहमंत्री अमित शाह यांनी देखील खासदार हरसिमरत कौर बादल यांच्याशी दूरध्वनीवरून संवाद साधत सुखबीर सिंग बादल यांच्या प्रकृतीची विचारपूस केली आहे. या हल्ल्याप्रकरणी पोलिसांनी आरोपीला घटनास्थळावरूनच ताब्यात घेतले असून पुढील तपास सुरू आहे. कर्तव्यकठोर आणि प्राण पणाला लावून व्हीव्हीआयपी (VVIP) सुरक्षेचा आदर्श निर्माण करणाऱ्या पोलीस निरीक्षक संतोष केंद्रे यांच्या या धाडसाचे संपूर्ण देशभरातून आणि महाराष्ट्र पोलीस दलातून कौतुक केले जात आहे.