इराणची मोठी कारवाई! जैश अल-अदल या दहशतवादी संघटनेच्या संपूर्ण टीमचा खात्मा; पाकिस्तान सीमेवर थरार

तेहरान:
इराण आणि पाकिस्तानच्या सीमेवर इराणच्या सुरक्षा दलांनी एक मोठी लष्करी कारवाई केली आहे. या कारवाईत इराणने 'जैश अल-अदल' (ज्याला इराणमध्ये जैश अल-जुल्म म्हटले जाते) या दहशतवादी संघटनेच्या एका संपूर्ण ऑपरेशन टीमचा खात्मा केला आहे. हे दहशतवादी पाकिस्तानची सीमा ओलांडून इराणमध्ये घुसखोरी करण्याच्या प्रयत्नात असताना इराणने ही धडक कारवाई केली.

नेमकी घटना काय?
इराणच्या 'तस्नीम' वृत्तसंस्थेनुसार, दहशतवाद्यांचा हा गट पाकिस्तानच्या बलूचिस्तान प्रांतातील रास्क क्षेत्रातून इराणच्या सीमेत शिरण्याचा प्रयत्न करत होता. इराणच्या गुप्तचर यंत्रणांना याची पूर्वकल्पना मिळाल्याने सुरक्षा दलांनी सापळा रचला होता. दोन्ही बाजूंनी झालेल्या चकमकीत इराणने या संघटनेचे अनेक महत्त्वाचे दहशतवादी ठार केले असून, त्यांची संपूर्ण टीमच संपवली आहे.

कुलभूषण जाधव कनेक्शन:
ही कारवाई भारतासाठी देखील महत्त्वाची मानली जात आहे. जैश अल-अदल या संघटनेचे संबंध पाकिस्तानची गुप्तचर संघटना 'आयएसआय'शी (ISI) असल्याचे बोलले जाते. विशेष म्हणजे, २०१६ मध्ये भारतीय नौदलाचे माजी अधिकारी कुलभूषण जाधव यांचे इराणमधून अपहरण करून त्यांना पाकिस्तानात नेण्यामागे याच दहशतवादी संघटनेचा हात होता, असा संशय आहे. त्यामुळे या संघटनेवर झालेल्या कारवाईमुळे भारताच्या एका मोठ्या शत्रूचा खात्मा झाला आहे.

इराण-पाकिस्तान सीमावाद पेटणार?
या कारवाईमुळे इराण आणि पाकिस्तानमधील राजनैतिक तणाव पुन्हा एकदा वाढण्याची शक्यता आहे. इराणने वारंवार आरोप केला आहे की, पाकिस्तान आपल्या जमिनीचा वापर इराणविरोधी दहशतवादी कारवायांसाठी करू देत आहे. यापूर्वी देखील इराणने पाकिस्तानमधील दहशतवादी अड्ड्यांवर क्षेपणास्त्र हल्ले केले होते.

जगावर ऊर्जा संकट असतानाची कारवाई:
सध्या अमेरिका आणि इराणमध्ये 'स्ट्रेट ऑफ होर्मूज' (Strait of Hormuz) वरून तणाव सुरू आहे. या नाकेबंदीमुळे जगात इंधन संकट निर्माण झाले असतानाच, इराणने आपल्या सीमा सुरक्षित करण्यासाठी केलेली ही कारवाई अत्यंत महत्त्वाची मानली जात आहे. या कारवाईमुळे जैश अल-अदल या संघटनेला मोठा धक्का बसला असून, इराणच्या सीमावर्ती भागातील घुसखोरीला चाप बसण्याची शक्यता आहे.