Mahesh Gaikwad News : महेश गायकवाड यांच्या प्रकृतीसंदर्भात मोठी अपडेट; डॉक्टरांनी दिली महत्वाची माहिती

Mahesh Gaikwad News : शहरात सत्ताधारी भाजप आणि शिवसेना शिंदे गटाच्या पदाधिकाऱ्यांमध्ये मोठा राडा झाला. भाजप आमदार गणपत गायकवाड यांनी शिवसेना शिंदे गटातील शहर प्रमुख महेश गायकवाड यांच्यावर ५ गोळ्या झाडल्या. धक्कादायक बाब म्हणजे पोलीस ठाण्यातच हा प्रकार घडला. या घटनेत महेश गायकवाड गंभीर जखमी झाले असून त्यांच्यावर रुग्णालयात उपचार सुरू आहे.

दरम्यान, डॉक्टरांनी महेश गायकवाड यांच्या प्रकृतीबाबत महत्वाची अपडेट दिली आहे. गोळीबारानंतर पोलिसांनी महेश गायकवाड यांना उपचारासाठी उल्हासनगरच्या खाजगी रुग्णालयामध्ये दाखल केले होते. 

Ganpat Gaikwad : गोळीबारानंतर आमदार गणपत गायकवाड यांची पहिली प्रतिक्रिया; शिंदे पिता-पुत्रांवर केले गंभीर आरोप

मात्र, प्रकृती चिंताजनक असल्याने त्यांना ठाण्यातील ज्युपिटर हॉस्पिटलमध्ये दाखल करण्यात आले. आता महेश गायकवाड यांच्या प्रकृतीसंदर्भात कल्याण शिवसेना जिल्हाप्रमुख गोपाळ लांडगे यांनी महत्वाची माहिती दिली आहे.

महेश यांच्यावर शस्त्रक्रिया करण्यात आली असून सर्व गोळ्या काढण्यात डॉक्टरांना यश आले आहे. तसेच राहुल पाटील यांच्या शरीरातूनही दोन गोळ्या डॉक्टरांनी बाहेर काढल्या आहे, असं गोपाळ लांडगे यांनी सांगितलं.

यावेळी खासदार श्रीकांत शिंदे देखील ज्युपिटर हॉस्पिटलमध्ये उपस्थित होते. सध्या महेश गायकवाड आणि राहुल पाटील दोघांची प्रकृती स्थिर आहे. चिंता करण्याचे कुठलेही कारण नाही, अशी माहिती देखील गोपाळ लांडगे यांनी दिली.

दरम्यान, महेश गायकवाड यांच्यावरील गोळीबारानंतर पोलिसांनी आमदार गणपत गायकवाड यांच्यासह सहा जणांवर गुन्हा दाखल करण्यात आला आहे. यातील तिघांना अटक करण्यात आली असून इतर तिघांचा शोध सुरू आहे. शुक्रवारी तिन्ही आरोपींना न्यायालयात हजर करण्यात येणार आहे.