IIIT नागपूरमध्ये कोल्हापूरच्या विद्यार्थ्याची आत्महत्या; परीक्षेच्या तणावातून उचलले टोकाचे पाऊल, विद्यार्थ्यांचा संतापस

विस्तर बातमी: नागपूरमधील भारतीय माहिती तंत्रज्ञान संस्थेत (IIIT) शिकणाऱ्या एका २० वर्षीय विद्यार्थ्याने हॉस्टेलच्या नवव्या मजल्यावरून उडी मारून आत्महत्या केल्याची धक्कादायक घटना घडली आहे.

श्रेयस चंद्रकांत माने असे या दुर्दैवी विद्यार्थ्याचे नाव असून तो कोल्हापूरचा रहिवासी होता. या घटनेनंतर संतप्त विद्यार्थ्यांनी कॉलेज प्रशासनाविरोधात जोरदार निदर्शने केली आहेत. नेमकी घटना काय?श्रेयस हा 'कॉम्प्युटर सायन्स'च्या दुसऱ्या वर्षात (चौथ्या सेमिस्टरमध्ये) शिक्षण घेत होता.

सोमवारी पहाटे ४ ते ४:३० च्या दरम्यान त्याने हॉस्टेल इमारतीच्या नवव्या मजल्यावरून उडी घेतली. सकाळी ७ च्या सुमारास तो रक्ताच्या थारोळ्यात पडलेला आढळला. त्याला तातडीने रुग्णालयात नेण्यात आले,
मात्र डॉक्टरांनी त्याला मृत घोषित केले.

आत्महत्येचे कारण: प्राथमिक माहितीनुसार, श्रेयस परीक्षेच्या तणावाखाली होता. त्याचे काही विषयांचे बॅकलॉग होते आणि अभ्यासाचा ताण त्याला सहन झाला नाही.
सोमवारीच त्याची परीक्षा सुरू होणार होती, जी या घटनेचा मुख्य ट्रिगर असल्याचे मानले जात आहे. घटनास्थळी कोणतीही 'सुसाईड नोट' सापडलेली नाही.

विद्यार्थ्यांचा एल्गार: या घटनेची माहिती मिळताच शेकडो विद्यार्थी कॅम्पसमध्ये जमा झाले आणि त्यांनी प्रशासनाच्या भूमिकेवर प्रश्नचिन्ह उपस्थित केले. विद्यार्थ्यांमध्ये मोठा असंतोष असून, शैक्षणिक ताण आणि विद्यार्थ्यांच्या मानसिक
आरोग्याकडे दुर्लक्ष होत असल्याचा आरोप केला जात आहे. बुटीबोरी पोलिसांनी याप्रकरणी अकस्मात मृत्यूची नोंद केली असून श्रेयसचा मोबाईल फोन तपासासाठी ताब्यात घेतला आहे. पोलीस या प्रकरणाचा अधिक तपास करत आहेत.