IRCTC ची या 25 मेल-एक्सप्रेस गाड्यांमध्ये ई-पॅन्ट्री, ऑनलाईन जेवण बुक करता येणार

मेल-एक्सप्रेस गाड्यांमधून प्रवास करणाऱ्या,ज्या गाड्यांच्या तिकिटामध्ये जेवण समाविष्ट नाही अशा प्रवाशांच्या सोयीसाठी IRCTC ने ई-पॅन्ट्री ऑनलाईन जेवण बुकिंग सेवा सुरू केली आहे. ही एक डिजिटल सुविधा असून पॅन्ट्री कार असलेल्या निवडक गाड्यांमध्ये प्रवासापूर्वीच जेवण बुक करता येणार आहे, ज्यामुळे प्रवास अधिक सुखकर व तणावमुक्त होणार आहे.

ही सेवा IRCTC च्या तिकीट बुकिंग संकेतस्थळावर www.irctc.co.in वर मिळणार आहे. कन्फर्म, RAC तसेच अंशतः कन्फर्म तिकीटधारक प्रवासी या सेवेचा लाभ घेऊ शकतात. प्रवाशांना जेवण आणि रेल नीर यांची आगाऊ बुकिंग करता येणार आहे. हे जेवण प्रवासादरम्यान पॅन्ट्री कार कर्मचाऱ्यांमार्फत थेट त्यांच्या आसनावर वितरित केले जाणार आहे.

ई-पॅन्ट्री सेवेची प्रक्रिया

बुकिंग: तिकीट बुक करताना किंवा “Booked Ticket History” या पर्यायातून प्रवासी ई-पॅन्ट्री जेवण पर्याय निवडू शकतात.

पुष्टीकरण: बुकिंग झाल्यानंतर प्रवाशांना एसएमएस किंवा ई-मेलद्वारे पुष्टी संदेश व Meal Verification Code (MVC) प्राप्त होतो.

जेवण वितरण: प्रवासाच्या दिवशी MVC विक्रेत्यास दाखवल्यानंतर पूर्व-बुक केलेले जेवण प्रवाशांच्या आसनावर दिले जाते.

ई-पॅन्ट्री सेवेची वैशिष्ट्ये

डिजिटल जेवण बुकिंग: मानक जेवण व रेल नीरची सुलभ ऑनलाईन आगाऊ बुकिंग.

कॅशलेस पेमेंट: प्रवासादरम्यान रोख व्यवहाराची गरज नाही; पूर्णपणे डिजिटल पेमेंट सुविधा.

प्रमाणित वितरण: MVC द्वारे योग्य प्रवाशालाच जेवण मिळण्याची खात्री.

पारदर्शकता आणि देखरेख: डिजिटल डॅशबोर्डद्वारे पारदर्शकता, जबाबदारी व कर अनुपालन सुनिश्चित.

जेवण न मिळाल्यास परतावा : बुक केलेले जेवण न मिळाल्यास प्रवाशांना परताव्याची सुविधा. रद्दीकरण आणि परताव्याची माहिती ई-मेल, एसएमएस किंवा व्हॉट्सअ‍ॅपद्वारे दिली जाईल.

या सेवेचा प्रारंभिक प्रयोग विवेक एक्सप्रेस ( गाडी क्रमांक 22503/04 ) या भारतातील सर्वाधिक लांब अंतर कापणाऱ्या गाडीवर करण्यात आला होता. सध्या ही सेवा 25 मेल-एक्सप्रेस गाड्यांमध्ये उपलब्ध करण्यात आली आहे.