लालकृष्ण अडवाणींच्या प्रकृतीबाबत महत्त्वाची बातमी! भाजपचे ज्येष्ठ नेते व माजी उपपंतप्रधान आयसीयूत दाखल; छातीत संसर्गामुळे दिल्लीच्या अपोलो रुग्णालयात उपचार सुरू!

भारतीय जनता पार्टीचे (BJP) संस्थापक सदस्य, देशाचे माजी उपपंतप्रधान आणि मार्गदर्शक मंडळOतील ज्येष्ठ नेते लालकृष्ण अडवाणी यांच्या प्रकृतीबाबत एक महत्त्वाची बातमी समोर आली आहे. ९८ वर्षीय लालकृष्ण अडवाणी यांना शुक्रवारी रात्री उशिरा अचानक प्रकृती अस्वास्थ्यामुळे दिल्लीतील प्रसिद्ध अशा इंद्रप्रस्थ अपोलो रुग्णालयात (Apollo Hospital) उपचारासाठी दाखल करण्यात आले आहे. वयोमानामुळे उद्भवलेल्या त्रासामुळे आणि प्रामुख्याने छातीत संसर्ग (Chest Infection) झाल्यामुळे त्यांना तातडीने रुग्णालयात हलवण्यात आले असून सध्या त्यांच्यावर विशेष वैयक्तिक वैद्यकीय पथकाच्या निगराणीखाली उपचार सुरू आहेत.

आयसीयूत (ICU) सुरू आहेत उपचार, प्रकृती स्थिर:

वैद्यकीय सूत्रांनी आणि रुग्णालयाकडून जारी करण्यात आलेल्या माहितीनुसार, लालकृष्ण अडवाणी यांना उपचारासाठी थेट गहन चिकित्सा युनिटमध्ये (ICU) आणि पल्मोनरी विभागामध्ये ठेवण्यात आले आहे. न्यूरोलॉजी आणि पल्मोनरी विभागातील वरिष्ठ तज्ज्ञ डाॅक्टरांची टीम त्यांच्या प्रकृतीवर सातत्याने लक्ष ठेवून आहे. सध्या त्यांची प्रकृती पूर्णपणे स्थिर असून त्यांना वैद्यकीय निरीक्षणाखाली (Medical Observation) ठेवण्यात आले आहे. या वृत्ताची माहिती मिळताच राजकीय वर्तुळात चिंता व्यक्त केली जात असून अनेक नेत्यांनी त्यांच्या प्रकृतीची विचारपूस केली आहे.

केंद्रीय मंत्री जेपी नड्डा यांनी घेतली भेट:

ज्येष्ठ नेते लालकृष्ण अडवाणी यांना रुग्णालयात दाखल करण्यात आल्याची माहिती समजताच केंद्रीय मंत्री आणि भाजपचे राष्ट्रीय अध्यक्ष जेपी नड्डा यांनी तात्काळ अपोलो रुग्णालयात धाव घेतली. त्यांनी रुग्णालयात जाऊन लालकृष्ण अडवाणी यांची प्रत्यक्ष भेट घेतली आणि त्यांच्या प्रकृतीची आस्थेने विचारपूस केली तसेच डॉक्‍टरांकडून उपचाराची सविस्तर माहिती जाणून घेतली. देश-विदेशातून त्यांच्या प्रकृतीत लवकरात लवकर सुधारणा व्हावी, यासाठी सदिच्छा व्यक्त केल्या जात आहेत.