सरकारी कर्मचाऱ्यांची दिवाळी आधीच साजरी होणार! जुलैपासून महागाई भत्त्यात ३% वाढीची शक्यता; ८व्या वेतन आयोगाबाबतही मोठी अपडेट!

सरकारी कर्मचाऱ्यांसाठी खुशखबर! जुलैपासून महागाई भत्ता ३% वाढण्याची शक्यता; पगारातही होणार वाढ

नवी दिल्ली: केंद्र सरकारच्या लाखो सरकारी कर्मचाऱ्यांसाठी आनंदाची बातमी आहे. जुलै २०२६ पासून महागाई भत्त्यात (DA) सुमारे ३ टक्क्यांची वाढ होण्याची शक्यता व्यक्त केली जात आहे. यामुळे कर्मचाऱ्यांच्या मासिक पगारात वाढ होणार असून वाढत्या महागाईच्या पार्श्वभूमीवर मोठा दिलासा मिळण्याची अपेक्षा आहे.

कामगार मंत्रालयाने जाहीर केलेल्या औद्योगिक कामगार ग्राहक किंमत निर्देशांक (CPI-IW) च्या ताज्या आकडेवारीनुसार, मे २०२६ मध्ये निर्देशांक १४९.९ वरून १५०.८ वर पोहोचला आहे. या वाढीमुळे महागाई भत्त्यात किमान ३ टक्क्यांची वाढ होण्याची शक्यता वर्तवली जात आहे.

यापूर्वी केंद्र सरकारने महागाई भत्त्यात २ टक्क्यांची वाढ मंजूर केली होती. आता आणखी ३ टक्क्यांची वाढ झाल्यास महागाई भत्ता ५८ टक्क्यांवरून ६० टक्क्यांपर्यंत जाण्याची शक्यता आहे. मात्र, याबाबतचा अंतिम निर्णय केंद्र सरकारच्या अधिकृत घोषणेनंतरच स्पष्ट होईल.

८वा वेतन आयोग कधी लागू होणार?

केंद्र सरकारी कर्मचारी सध्या ८व्या वेतन आयोगाच्या अंमलबजावणीची प्रतीक्षा करत आहेत. उपलब्ध माहितीनुसार, आयोगाच्या शिफारशी पुढील वर्षाच्या अखेरीस येण्याची शक्यता आहे. नवीन वेतन आयोग जानेवारी २०२६ पासून पूर्वलक्षी प्रभावाने लागू करण्यात येऊ शकतो.

जर हा निर्णय झाला, तर कर्मचाऱ्यांना १८ ते २४ महिन्यांची थकबाकी (Arrears) एकरकमी मिळू शकते. जुलै २०२६ मधील महागाई भत्त्याची वाढ सातव्या वेतन आयोगाच्या आधारे दिली जाईल आणि त्यानंतर ८वा वेतन आयोग लागू झाल्यास वेतनातील व महागाई भत्त्यातील तफावतही कर्मचाऱ्यांच्या खात्यात जमा होण्याची शक्यता आहे.

अधिकृत घोषणा कधी?

जुलै २०२६ पासून लागू होणाऱ्या महागाई भत्त्याची औपचारिक घोषणा ऑक्टोबरमध्ये, दिवाळीच्या सुमारास होण्याची शक्यता आहे. अंतिम निर्णय केंद्र सरकारच्या मंजुरीनंतर जाहीर केला जाईल.

टीप: महागाई भत्त्यातील वाढ आणि ८व्या वेतन आयोगासंदर्भातील काही बाबी सध्या उपलब्ध आकडेवारी व संभाव्य अंदाजांवर आधारित आहेत. अधिकृत निर्णय केंद्र सरकारच्या घोषणेनंतरच निश्चित होईल.

प्रतिनिधी - वंदना वेदपाठक