New Delhi : IRCTC वेबसाइट आणि ॲप डाऊन, तिकीट बुकिंग करताना एरर; ऐन दिवाळीत हजारो प्रवाशांना मनस्ताप

New Delhi : दिवाळी अगदी एका दिवसावर आली असून मुंबई, पुण्यासारख्या शहरात नोकरीसाठी आलेला कर्मचारी वर्ग मोठ्या संख्येने आता आपल्या गावी जाण्यासाठी निघाला आहे. अनेकजण मिळेल त्या मार्गाने खासगी बस, एसटी, ट्रेनने आपापल्या घरी दिवाळी सणासाठी पोहोचण्याचा प्रयत्न करत आहेत. मात्र अशात ट्रेनचे बुकिंग फूल झाले असून आज 17 ऑक्टोबरला IRCTC ची वेबसाइट डाऊन झाली असून IRCTC मोबाईल ॲपदेखील डाऊन झालं आहे.

आज सकाळी 9 वाजल्यापासून रेल्वे तिकीट बुक करताना अडचणी येत आहे. वेबसाइट आणि ॲपशिवाय IRCTC च्या इतर सर्विसेस वापरतानाही लोकांना अनेक अडचणी येत आहेत. आयआरसीटीसीच्या अधिकाऱ्यांनी काही तांत्रिक कारणांमुळे वेबसाइट आणि ॲपमध्ये समस्या असल्याची माहिती दिली असून हा टेक्निकल इश्यू लवकरात लवकर सोडवण्याचा प्रयत्न केला जात असल्याचंही अधिकाऱ्यांनी सांगितलं.

सकाळी 9 वाजल्यापासून लोकांनी तक्रार करण्यास सुरुवात केली आहे. सकाळी 11 वाजेपर्यंत जवळपास ६ हजारहून अधिक लोकांनी तिकीट बुक करताना समस्या येत असल्याचं सांगितलं. तसंच सोशल मीडियावरही तिकीट बुक करता येत नसल्याने नाराजी व्यक्त केली आहे.

IRCTC वर सकाळी 10 वाजल्यापासून तात्काळ एसी तिकीट बुक करण्याची वेळ असते. तर स्लिपर क्लाससाठी तात्काळ तिकीट बुकिंग 11 वाजल्यापासून सुरू होतं. आयआरसीटीसीचं ॲप तात्काळ तिकीट बुकिंगच्या वेळेआधीच डाऊन झाल्याने धनत्रयोदशी उद्या गावाला जाण्याऱ्यांची मोठी निराशा झाली. पण आयआरसीटीच्या साइटची ही समस्या आजचीच नाही. याआधीही अनेकदा तिकीट काढताना साइट डाऊन असल्याची तक्रार असते. मेन्टेनन्ससाठी ई-तिकिटींग सर्विस सुरू नसल्याचा मेसेज पॉपअप होतो.