दिवे घाटात तलवारी-कोयत्यांसह टोळक्याचा धुडगूस; नागरिकांमध्ये भीतीचं वातावरण

पुणे: जिल्ह्यातील दिवे घाट परिसरात बुधवारी रात्री मोठ्या प्रमाणात तरुणांच्या टोळक्याने तलवारी आणि कोयते हातात घेऊन दहशत माजवल्याचा धक्कादायक प्रकार समोर आला आहे. १०० ते १५० दुचाकींवरून आलेल्या या टोळक्याने भररस्त्यात धारदार शस्त्रांचे प्रदर्शन करत परिसरात भीतीचे वातावरण निर्माण केले.

या घटनेचे व्हिडिओ सोशल मीडियावर व्हायरल झाल्यानंतर नागरिकांमध्ये संताप व्यक्त केला जात असून पुणे ग्रामीण पोलिसांच्या कारवाईकडे सर्वांचे लक्ष लागले आहे.

दरम्यान, आमदार रोहित पवार यांनीही या प्रकरणाची गंभीर दखल घेत पोलिसांना कठोर कारवाई करण्याचे आवाहन केले आहे. “कायद्याला भीक न घालणाऱ्या अशा टोळक्यांवर कोणाच्याही दबावाला बळी न पडता कठोर कारवाई झाली पाहिजे,” असे त्यांनी म्हटले आहे.

गेल्या काही दिवसांत पुणे ग्रामीण भागात कोयता गँग आणि गुन्हेगारीच्या वाढत्या घटनांमुळे नागरिकांमध्ये असुरक्षिततेची भावना निर्माण झाली आहे.